भैरवी गाउँपालिका–१ जलजले क्षेत्रमा ८० अर्ब ७० करोड घनमिटर ग्यास भण्डारण रहेको पुष्टि भएको छ।

नेपाल सरकारलाई बुझाइएको अन्तिम प्रतिवेदन अनुसार, चीनको ‘चाइना जियोलोजिकल सर्वे’ कम्पनी द्वारा गरिएको विस्तृत अध्ययनले प्रारम्भिक अनुमान (१ अर्ब १२ करोड घनमिटर) भन्दा धेरै ठूलो भण्डार पुष्टि गरेको छ।

खानी तथा भूगर्भ विभागका प्रवक्ता धर्मराज खड्का का अनुसार, यो भण्डार व्यावसायिक रुपमा निकाल्न सकिने क्षमता वेल टेस्टिङ पछि मात्र स्पष्ट हुनेछ। यस चरणमा ड्रिल गरिएको क्षेत्रमा चट्टान फुटाउने वा ग्यास विस्थापित गर्ने परीक्षण गरिनेछ।

नेपाल र चीनबीच पेट्रोलियम खानी अन्वेषणका लागि दुई अर्ब ४० करोडको आर्थिक र प्राविधिक सहयोगमा सम्झौता भएको थियो। सोहीअनुसार सेस्मिक, जियोलोजिकल, म्याग्नेटोटेल्युरिक र जियोकेमिकल सर्वे सम्पन्न गरिएको छ।

विशेषज्ञहरूले दैलेखको ग्यासलाई ‘शेल वा टाइट ग्यास’ प्रकृतिको भएको र उत्खनन कठिन हुने बताएका छन्। व्यावसायिक प्रयोजनका लागि चट्टान फोड्नुपर्ने चुनौती रहेको छ।

२०७६ असोजदेखि जलजले क्षेत्रमा अन्वेषण सुरु गरिएको थियो र आगामी फागुन २१ को निर्वाचन मा यस विषयलाई राजनीतिक दलहरूले आफ्नो प्रमुख एजेन्डा बनाएका छन्।