काठमाडौं, १८ मंसिर – नेपाल नागरिक उड्डयन प्राधिकरण (क्यान) हाल नेतृत्वविहीन बनेको छ। बुधबार क्यानका महानिर्देशक प्रदीप अधिकारीमाथि अख्तियार दुरुपयोग अनुसन्धान आयोगले मुद्दा दायर गरेपछि उनी स्वतः निलम्बित भएका हुन्। यस घटनापछि प्राधिकरणको निमित्त महानिर्देशक को हुने भन्ने चासो बढेको छ।

क्यानमा महानिर्देशकको मातहत पाँच उपमहानिर्देशक तहका ६ जना अधिकारी रहेका छन्। वरीयताको आधारमा प्रतापबाबु तिवारी पहिलो स्थानमा छन्, त्यसपछि क्रमशः प्रेमनाथ ठाकुर, हंशराज पाण्डे, देवचन्द्र लाल कर्ण, जगन्नाथ निरौला र बाबुराम पौडेल छन्। इतिहासअनुसार क्यानमा आन्तरिक रूपमा निमित्त वा स्थायी महानिर्देशक नियुक्त गर्ने चलन रहेको हुँदा यिनै अधिकारीहरूबाट निमित्त नियुक्त हुने सम्भावना छ।

अहिलेसम्म आयोगले निलम्बनको पत्र मन्त्रालयमा पठाएको छैन। संस्कृति, पर्यटन तथा नागरिक उड्डयन मन्त्रालयका सचिव हरिकुमार मैनालीका अनुसार पत्र प्राप्त भएमा मन्त्रीको सिफारिसमा प्रधानमन्त्रीले नै निमित्त महानिर्देशकको निर्णय गर्नेछन्। तर, क्यानले आफ्नो वेबसाइटमा अधिकारीको नाम हटाइसकेको छ।

क्यानले डिसेम्बर ३१ मा २७ औं वार्षिकोत्सव मनाउने तयारी गरेको छ। आगामी कार्यकालमा पनि मुख्य दाबेदार हुने अवस्था भएकोले, तत्काल वरीयतामा पहिलो नम्बरमा रहेका तिवारीले निमित्त जिम्मेवारी पाउने सम्भावना बढी देखिन्छ। अधिकारीको कार्यकाल माघ १९ मा सकिँदैछ।