१८ मंसिर, काठमाडौं – नेकपा एमालेका उपमहासचिव विष्णु रिमालले ११औं महाधिवेशनबाट अध्यक्षमा केपी शर्मा ओली नै दोहोरिने दाबी गरेका छन्। उनले पार्टीभित्र अहिले अध्यक्ष ओलीको विपक्षमा उभिनुपर्ने कुनै आवश्यकतालाई पनि खारेज गरेका छन्।

पार्टी वरिष्ठ उपाध्यक्ष ईश्वर पोखरेलले अध्यक्ष पदमा उम्मेदवारी घोषणा गरेको सन्दर्भमा रिमालले भने, “अध्यक्ष बन्ने इच्छा व्यक्त गर्न पाइन्छ, तर पार्टी कमिटीले गरेका निर्णय मान्नु अनिवार्य छ।”

उपमहासचिव रिमालले महाधिवेशनसम्म एमालेमा देखिएको दुई धार समाप्त हुने पनि दाबी गरे। अध्यक्ष ओली र वरिष्ठ उपाध्यक्ष पोखरेलले आ–आफ्नो समूह बनाएर अघि बढ्ने चर्चा भए पनि रिमालले त्यसले पार्टीमा फरक नपार्ने बताए।

रिमालले उम्मेदवारी घोषणा गरेका नेताहरूलाई ‘चर्चामा आउने रहर’ भएको बताए र कम्युनिस्ट पार्टीमा नेतृत्व समूहले टिम बनाउने अभ्यास हुने पनि बताए। उनले अध्यक्ष पदमा ओली फाइनल भइसकेको उल्लेख गर्दै भने, “कम्युनिस्ट पार्टीमा नेतृत्व बनाउने भनेको टिम मेकिङ हो। टिममा एक नम्बरको व्यक्तिको बारेमा हामीले फाइनल गरिसकेका छौं, अध्यक्ष केपी ओली हुनुहुन्छ।”

उनले महाधिवेशन प्रतिनिधि छनोटमा पक्षपात भएको आरोपलाई ‘हल्ला’ मात्र भएको दाबी गर्दै महाधिवेशन २९ गते सम्पन्न भएपछि अध्यक्षमा केपी ओलीको निर्वाचित पुष्टि हुने बताए।