काठमाडौँ । नेपाली कांग्रेसभित्र महाधिवेशन कहिले गर्ने भन्ने विषयमा जारी विवाद चर्किँदै जाँदा संस्थापन पक्षीय नेताहरू आइतबार मध्य बानेश्वरमा जुटेका छन्। केन्द्रीय सदस्य किरणराज पौडेलका अनुसार महाधिवेशनसम्बन्धी रणनीति र धारणा तयार गर्न संस्थापन पक्षीय नेताहरूको भेला मध्य बानेश्वरस्थित सनराइज पार्टी प्यालेसमा भइरहेको छ।

भेलामा पूर्व उपसभापति विमलेन्द्र निधि, पूर्व महामन्त्री कृष्णप्रसाद सिटौला लगायत करिब ९० जना केन्द्रीय सदस्य सहभागी छन्।

कांग्रेसमा फागुन २१ मा हुने निर्वाचनअघि महाधिवेशन गर्नुपर्ने कि निर्वाचनपछि गर्ने भन्ने विषयमा दुवै पक्षबीच तीव्र मतभेद छ। नियमित महाधिवेशन गर्ने कि विशेष महाधिवेशन गर्ने भन्ने विवाद पनि उस्तै छ।

संस्थापन पक्षले निर्वाचनको तयारीका लागि समय आवश्यक भएको भन्दै निर्वाचनपछि मात्र महाधिवेशन गर्नुपर्ने तर्क अघि सारेको छ भने महामन्त्रीद्वय गगन थापा र विश्वप्रकाश शर्माले निर्वाचनअघि नै नियमित महाधिवेशन, नभए विशेष महाधिवेशन अनिवार्य रूपमा गर्नुपर्ने अडान लिएका छन्।

यही विवादकै कारण असोज २८ बाट सुरु भएको केन्द्रीय कार्यसमिति बैठक पनि अनिर्णीत बनेको छ। सोमबारका लागि बोलाइएको कार्यसमिति बैठकमा कसरी प्रस्तुत हुने भन्ने रणनीति बनाउन संस्थापन पक्ष अहिले छलफलमा जुटेको बताइएको छ।