धनगढी — नेकपा एमालेको ११औं महाधिवेशनका लागि प्रतिनिधि छनोटप्रति असन्तुष्टि जनाउँदै पञ्चेश्वर गाउँपालिकाका अध्यक्ष गोरखबहादुर चन्दले आइतबार पार्टी परित्यागको घोषणा गरेका छन्।

सर्वसम्मत प्रतिनिधि चयनको नाममा गुटगत चलखेल भएको आरोप लगाउँदै चन्दले पार्टी छोडेको बताएका छन्। उनले सामाजिक सञ्जाल फेसबुकमा पार्टी परित्यागको घोषणा गर्दै आफ्नो जिम्मेवारी जिल्ला इन्चार्ज लिलाधर भट्ट र पालिकाका उपाध्यक्ष बिना भट्ट तथा वडाध्यक्ष रामसिंह पुजारालाई हस्तान्तरण गरेको उल्लेख गरेका छन्।

चन्दले आफूलाई महाधिवेशन प्रतिनिधि बन्न नदिएको र यसमा लिलाधर भट्ट र पूर्वमन्त्री दामोदर भण्डारीले रोक लगाए भन्ने आरोप समेत लगाएका छन्। उनले भने, “पार्टीभित्रको चरम गुटबन्दी, चाकरी र झोले प्रथाले धेरै दिक्क बनाएको थियो। निरंकुश नेतृत्वविरुद्ध समय–समयमा आवाज उठाएँ, तर अन्ततः सकिन।”

एमाले बैतडीले शनिबार १५ जना राष्ट्रिय महाधिवेशन प्रतिनिधि सर्वसम्मत रूपमा चयन गरिसकेको छ।