काठमाडौँ — फागुन २१ मा हुने प्रतिनिधि सभा निर्वाचनका लागि मधेस केन्द्रित दलहरूबीच सहमति जुट्न सकेको छैन। सात वटा दल मिलेर बनेको संघीय लोकतान्त्रिक मोर्चाले एउटै चुनाव चिह्न, सिट बाँडफाँड र तालमेलका तीनवटा विकल्प प्रस्तुत गरेको भए पनि कुनै विकल्पमा सबै दलहरू सहमत हुन सकेका छैनन्।

डा. सीके राउत नेतृत्वको जनमत पार्टी कुनै पनि विकल्पमा सहभागी हुन तयार छैन। जनता समाजवादी पार्टी नेपाल उपेन्द्र यादव नेतृत्वमा केही सिटमा मात्र तालमेल गर्ने पक्षमा रहेको छ भने महन्थ ठाकुर नेतृत्वको लोसपा नेपाल हरेक सिटमा तालमेल गर्ने पक्षमा छ। राजेन्द्र महतो नेतृत्वको राष्ट्रिय मुक्ति पार्टी एउटै चुनाव चिह्नबाट जाने पक्षमा छ।

हाल, राष्ट्रिय मुक्ति पार्टी, नागरिक उन्मुक्ति पार्टी र जनता समाजवादी पार्टी (अशोक राई नेतृत्व) ले जाँतो चुनाव चिह्नमा चुनावमा सहभागी हुने सहमति गरिसकेका छन्। यी तीन दलले संयुक्त रूपमा निर्वाचन आयोगमा निवेदन दर्ता पनि गरिसकेका छन्।

लोसपा नेपालका महासचिव डा. सुरेन्द्र झाले भने, “मोर्चाभित्र एउटै विधिमा सहकार्यका लागि सहमति नबने पनि अन्ततः चुनावमा दलबीच सहकार्य हुने छ। तीन दलले एउटै चुनाव चिह्नमा लड्ने सहमति गर्नु सकारात्मक छ।”

हाल जनमत पार्टी भने कुनै पनि दलसँग चुनावी तालमेल वा एकता नगरी एक्लै चुनावमा जाने तयारीमा रहेको छ। मोर्चाभित्र रहेका अन्य दलहरूबीच भने आगामी चुनाव अघि सहमतिको सम्भावना अझै खुला रहेको बताइएको छ।