काठमाडौँ — तिहारको बिदापछि नेपाल स्टक एक्सचेन्ज (नेप्से) परिसूचक आइतबार ५.१९ अङ्कले वृद्धि भई २५०९.०४ विन्दुमा पुगेको छ। आइतबार कुल २ अर्ब ६६ करोड १३ लाख रुपैयाँ बराबरको सेयर कारोबार भएको छ, जुन तिहारअघि (कात्तिक ३) भएको २ अर्ब ७९ करोड ११ लाख रुपैयाँको कारोबारभन्दा सामान्य रूपमा कम हो।

आज ९८ कम्पनीको सेयर मूल्य बढ्दा १४६ कम्पनीको मूल्य घटेको छ भने ४ कम्पनीको मूल्य स्थिर रहेको छ। १३ उपसमूहमध्ये चार समूहको परिसूचकमा वृद्धि देखिएको छ। जीवन बिमा समूह ०.६१ प्रतिशत, उत्पादन तथा प्रशोधन समूह ०.०२ प्रतिशत, निर्जीवन बिमा समूह ०.०८ प्रतिशत र ‘अन्य’ समूह ३.०५ प्रतिशतले बढेका छन्। बाँकी समूहको परिसूचक भने घटेको छ।

सिद्धार्थ बैंकद्वारा जारी ‘१०.७५ प्रतिशत एसबीएल डिबेन्चर २०८९’ ऋणपत्रको मूल्य १० प्रतिशतले बढेको छ। तर, तारागाउँ रेजेन्सी होटेल (हायात)को सेयर मूल्यमा ७.१६ प्रतिशतले उल्लेखनीय गिरावट आएको छ।

गत भदौ २४ गते जेनजी आन्दोलनका क्रममा होटेलमा क्षति पुगेको थियो। पुनर्निर्माणका लागि अर्को सूचना नआएसम्म होटेल बन्द रहने भएकोले कम्पनीको सेयर मूल्यमा गिरावट आएको नेप्से विश्लेषकहरूले बताएका छन्।

यस दिनको बजार गतिविधिले सामान्य सुधार देखाए पनि केही कम्पनीमा विशेष कारणले मूल्यमा अस्थिरता कायम रहेको देखिन्छ।