टेकुस्थित शुक्रराज ट्रपिकल तथा सरुवा रोग अस्पतालमा कार्यरत स्वास्थ्यकर्मी तथा सुरक्षाकर्मीमाथि गालीगलौज, धम्की र हातपात गरेको आरोपमा प्रहरीले तीन जनालाई पक्राउ गरेको छ।

पक्राउ पर्नेमा कीर्तिपुर नगरपालिका–४ का ४१ वर्षीय रामकुमार बुढाथोकी, २३ वर्षीय आयुष बुढाथोकी र २७ वर्षीय सचिन बुढाथोकी रहेका छन्।

जिल्ला प्रहरी परिसर काठमाडौंका अनुसार गत असोज १४ गते राति करिब १ बजे उनीहरू अस्पतालको आकस्मिक कक्षमा पुगेका थिए। त्यसक्रममा ड्युटीमा रहेका स्वास्थ्यकर्मी तथा सुरक्षाकर्मीलाई गालीगलौज तथा धाकधम्की दिँदै हातपात गरेको आरोप छ।

घटनाबारे जानकारी पाएपछि प्रहरी वृत्त कालीमाटीबाट खटिएको टोली घटनास्थलमा पुगेको थियो। प्रहरीले घटनास्थलबाटै तीनै जनालाई नियन्त्रणमा लिएको जनाएको छ।

पक्राउ परेका उनीहरूविरुद्ध ‘अभद्र व्यवहार गर्न नहुने कसूर’अन्तर्गत जिल्ला प्रशासन कार्यालय काठमाडौंबाट पाँच दिनको म्याद थप अनुमति लिइएको छ।

जिल्ला प्रहरी परिसर काठमाडौंका प्रवक्ता एवं प्रहरी उपरीक्षक दानबहादुर थापाका अनुसार घटनाबारे थप अनुसन्धान भइरहेको छ।