जेलेन्स्कीको दाबी : रुसले ४७ देशका नागरिकलाई युक्रेनविरुद्ध युद्धमा प्रयोग गरिरहेको छ
युक्रेनका राष्ट्रपति भोलोदिमर जेलेन्स्कीले रुसले युक्रेनविरुद्धको युद्धमा ४७ देशका नागरिकलाई प्रयोग गरिरहेको दाबी गरेका छन्। संयुक्त राष्ट्रसंघको ८१औँ महासभालाई सम्बोधन गर्दै उनले नेपाल, भारत, घाना, ताजिकिस्तान, यमन, केन्या, जिम्बाब्वे, क्युबालगायत देशका नागरिक रुसी पक्षबाट युद्धमा संलग्न रहेको बताएका हुन्।
जेलेन्स्कीले ती देशका सरकारलाई आफ्ना नागरिकलाई युद्धमा संलग्न हुनबाट रोक्न आग्रह गरेका छन्। उनका अनुसार रुसी पक्षले विभिन्न तरिका र प्रलोभनमार्फत विदेशी नागरिकलाई युद्धमा तानिरहेको छ। यो विवरण जेलेन्स्कीको दाबीका रूपमा आएको हो।
यसै क्रममा जेलेन्स्कीले रुसको कुर्स्क क्षेत्रमा पक्राउ परेका दुई उत्तर कोरियाली सैनिकलाई हालै दक्षिण कोरिया पठाइएको जानकारी दिएका छन्। ती सैनिक सन् २०२५ को सुरुआतमा युक्रेनी सेनाको नियन्त्रणमा परेका थिए।
दक्षिण कोरियाको विदेश मन्त्रालयले स्थानान्तरणको विस्तृत विवरण पुष्टि नगरे पनि युक्रेन तथा अन्य सम्बन्धित पक्षसँग छलफल भएको जनाएको छ। सैनिकहरूको इच्छाको सम्मान गर्दै अन्तर्राष्ट्रिय कानुन र मानवीय सिद्धान्तअनुसार विषय टुंग्याउने विषयमा परामर्श भएको मन्त्रालयले जनाएको छ।
रुस र उत्तर कोरियाबीचको सैन्य सहकार्यका क्रममा उत्तर कोरियाली सैनिकहरू रुसको कुर्स्क क्षेत्रमा तैनाथ भएको विषय यसअघि सार्वजनिक भएको थियो। युक्रेनले पक्राउ गरेका दुई सैनिकले दक्षिण कोरिया जान इच्छा व्यक्त गरेको विवरणसमेत सार्वजनिक भएको थियो।
महासभालाई सम्बोधन गर्दै जेलेन्स्कीले फिनल्यान्ड, अस्ट्रेलियालगायत साझेदारसँग ड्रोन तथा सुरक्षा सहकार्य विस्तार भइरहेको बताए। क्यानडासँग पनि ड्रोनसम्बन्धी सहकार्य अघि बढाउने तयारी भइरहेको उनले जानकारी दिए।
उनले आगामी हिउँदमा रुसी ताप तथा ऊर्जा पूर्वाधारलाई लक्षित गर्ने चेतावनीसमेत दिएका छन्। जेलेन्स्कीले रुसको पेट्रोल तथा डिजेल आपूर्तिमा असर पार्ने उद्देश्य रहेको बताउँदै रुससँगको व्यापार सीमित गर्न अन्तर्राष्ट्रिय समुदायलाई आग्रह गरेका छन्।
