काठमाडौं, २२ असार — चालु आर्थिक वर्षको तेस्रो त्रैमासमा नेपालको अर्थतन्त्र ३.५१ प्रतिशतले वृद्धि भएको प्रारम्भिक अनुमान गरिएको छ।

राष्ट्रिय तथ्याङ्क कार्यालयका अनुसार यो वृद्धि दोस्रो त्रैमासको तुलनामा ०.५८ प्रतिशत बिन्दुले बढी हो। यस अवधिमा विद्युत उत्पादन तथा वितरण, वित्तीय सेवा, व्यापार र यातायातजस्ता क्षेत्रको वृद्धि मुख्य कारण बनेका छन्।

कार्यालयका अनुसार १८ औद्योगिक वर्गीकरणमध्ये अधिकांश क्षेत्रमा सकारात्मक वृद्धि देखिएको छ। विद्युत तथा ग्यास क्षेत्रमा सबैभन्दा बढी २४.८८ प्रतिशत वृद्धि भएको छ भने वित्तीय तथा बीमा क्षेत्रमा १०.२७ प्रतिशत र यातायात तथा भण्डारणमा ७.८३ प्रतिशत वृद्धि भएको छ।

तर कृषि, वन तथा मत्स्य क्षेत्रको वृद्धिदर कमजोर रहेको छ भने औद्योगिक उत्पादन र सार्वजनिक प्रशासन क्षेत्रमा गिरावट देखिएको छ।

आर्थिक वर्षको तेस्रो त्रैमासमा अर्थतन्त्रको आकार ६४ खर्ब ६५ अर्ब रुपैयाँ पुगेको अनुमान गरिएको छ, जुन दोस्रो त्रैमासको ६४ खर्ब २७ अर्बभन्दा बढी हो।