काठमाडौं । बागमती प्रदेश सरकारले आजदेखि मन्त्रालयको संख्या घटाएर ८ कायम गरेको छ। गत २२ वैशाखमा बसेको मन्त्रिपरिषद् बैठकको निर्णयअनुसार मुख्यमन्त्री तथा मन्त्रिपरिषद्को कार्यालयसहित ८ मन्त्रालयको नयाँ संरचना कार्यान्वयनमा आएको हो।

सरकारका प्रवक्ता तथा आर्थिक मामिला एवं योजनामन्त्री प्रभात तामाङका अनुसार नयाँ संरचनाअनुसार मन्त्रालयको कार्यविभाजन र मन्त्रीहरूको जिम्मेवारीसम्बन्धी निर्णय शुक्रबार टुंग्याइनेछ।

यसअघि बागमती प्रदेश सरकारमा मुख्यमन्त्रीसहित १४ मन्त्रालय रहेका थिए। मन्त्रालय पुनर्संरचनासँगै कांग्रेस र एमालेबाट सरकारमा रहेका ६ जना मन्त्रीको जिम्मेवारी समाप्त हुने भएको छ।

नयाँ संरचनाअनुसार मुख्यमन्त्री तथा मन्त्रिपरिषद्को कार्यालय, आन्तरिक मामिला, कानुन तथा सहकारी, आर्थिक मामिला तथा योजना, खानेपानी ऊर्जा तथा सिँचाइ, भौतिक पूर्वाधार विकास, कृषि तथा पशुपन्छी, उद्योग भूमि तथा प्रशासन र सामाजिक विकास मन्त्रालय रहनेछन्।

मन्त्रालय संख्या घटाउने निर्णय कार्यान्वयनसँगै बागमती प्रदेशमा सत्ता समीकरणको विषयले पनि राजनीतिक चर्चा बढाएको छ। कांग्रेस र एमालेबीचको सहकार्यमा बनेको सरकारको भविष्यबारे दुवै दलबीच छलफल जारी रहेको छ।