लमजुङ । नेपाली कांग्रेसको १५औँ महाधिवेशनअन्तर्गत लमजुङ प्रदेशसभा 'ख' को क्षेत्रीय सभापति पदको निर्वाचनमा अन्तिम मत परिणाम बराबरी (३२४-३२४ मत) भएपछि उत्पन्न परिस्थितिलाई लिएर नेता इन्जिनियर दिपेन्द्र रावलले गम्भीर असन्तुष्टि व्यक्त गर्नुभएको छ। निर्वाचनको परिणाम बराबरी आउँदा पनि नेतृत्वले लोकतान्त्रिक र न्यायिक समाधान नखोजेको भन्दै उहाँले दुःख व्यक्त गर्नुभएको हो।

जनादेश बराबर आएपछि विवाद समाधानका लागि आफूले दुवै पक्षको सम्मान हुने गरी एक जनालाई केन्द्रीय महाधिवेशनमा सहभागी गराउने र अर्को साथीलाई पहिलो आधा कार्यकाल संगठनको नेतृत्व सुम्पिने प्याकेज प्रस्ताव राखेको रावलले जानकारी दिनुभएको छ। साथै, मत परिणाम बराबरी भएकै क्षणमा आपसी सहमति वा गोलाप्रथाजस्ता सर्वस्वीकार्य लोकतान्त्रिक विधिबाट निकास खोज्न गरिएको आग्रहलाई समेत नेतृत्वले बेवास्ता गरेको उहाँको भनाइ छ।

व्यक्तिविशेषभन्दा पनि संगठनको भविष्य र कार्यकर्ताको मतको सम्मान मुख्य विषय भएको उल्लेख गर्दै इन्जिनियर रावलले निर्वाचनले दिएको ५०-५० को जनादेशलाई कसरी न्याय गर्ने, कार्यकर्ताको भावनालाई कसरी सम्बोधन गर्ने र यस्तो असहज परिस्थितिमा लमजुङ कांग्रेसलाई कसरी एकताबद्ध राख्ने भन्ने गम्भीर प्रश्न नेतृत्वसमक्ष तेर्स्याउनुभएको छ। उहाँले पदभन्दा ठूलो संगठन, व्यक्तिभन्दा ठूलो लोकतान्त्रिक संस्कार र प्रतिस्पर्धाभन्दा ठूलो आपसी आत्मीयता रहने स्पष्ट पार्नुभएको छ।
घटनाक्रमले दुःखी बनाए पनि लोकतान्त्रिक प्रक्रिया र विधिप्रति आफ्नो विश्वास कायमै रहेको बताउँदै रावलले पार्टी नेतृत्वलाई कार्यकर्ताको भावना र लोकतान्त्रिक मूल्य-मान्यतालाई केन्द्रमा राखेर अविलम्ब विवेकपूर्ण निकास निकाल्न आग्रह गर्नुभएको छ।