उद्योग तथा वाणिज्य र श्रम तथा उपभोक्ता हित समितिले औद्योगिक क्षेत्रका लागि आवश्यक जग्गा व्यवस्थापनको विषय १४ दिनभित्र टुङ्गोमा पुर्‍याउन सरकारको ध्यानाकर्षण गराएको छ।

समितिका सभापति रहबर अन्सारीले सिमरा र मोरङमा औद्योगिक विकास क्षेत्रका लागि जग्गा व्यवस्थापनलाई प्राथमिकतामा राखी तत्काल सहजीकरण गर्न उद्योग, वाणिज्य तथा आपूर्ति मन्त्रालयलाई आग्रह गरे। सिमराको विशेष आर्थिक क्षेत्र (सेज) मा करिब ४०० बिघा जग्गा खाली रहेकाले औद्योगिक विकास क्षेत्रले लिजमा लिन सके दुई–तीन वर्षभित्र उद्योग स्थापना गर्न सकिने उनले बताए।

अन्सारीले मोरङ र बारामा उद्योग स्थापना गर्न सके रोजगारी र उत्पादनमा उल्लेख्य वृद्धि हुने बताए। यस्तै, भन्सारमा रहेका स्क्यानर तत्काल अद्यावधिक गरी सञ्चालनमा ल्याउन अर्थ मन्त्रालयलाई निर्देशन दिइएको छ।

बैठकमा कबाडी करका विषयमा सरोकारवाला, अर्थ मन्त्रालय र उद्योग मन्त्रालयसँग छलफल गरी आवश्यक पुनरावलोकन प्रक्रिया अघि बढाउनुपर्ने विषयमा समेत छलफल भएको थियो।