वीरगन्ज भन्सार नाका हुँदै चालु आर्थिक वर्षको पहिलो १० महिनामा सात खर्ब ९४ अर्ब ८७ करोड रुपैयाँ बराबरको वस्तु तथा सामान आयात भएको छ। यो रकम गत आर्थिक वर्षको सोही अवधिको तुलनामा एक खर्ब दुई अर्ब ४४ करोड रुपैयाँ अर्थात् करिब १५ प्रतिशतले बढी हो।

गत आर्थिक वर्षको पहिलो १० महिनामा वीरगन्ज नाका हुँदै ६ खर्ब ९२ अर्ब ४३ करोड रुपैयाँ बराबरको वस्तु आयात भएको थियो।

वीरगन्ज भन्सार कार्यालयका सूचना अधिकारी उदयसिंह विष्टका अनुसार पेट्रोलियम पदार्थ, फलाम तथा फलामजन्य सामग्रीको आयात बढेकाले समग्र आयातमा उल्लेखनीय वृद्धि देखिएको हो।

चालु आर्थिक वर्षको १० महिनामा मात्रै एक खर्ब ८१ अर्ब ७० करोड रुपैयाँ बराबरका पाँच प्रकारका पेट्रोलियम पदार्थ आयात भएका छन्। त्यस्तै, ६९ अर्ब ४२ करोड रुपैयाँ बराबरका फलाम तथा फलामजन्य सामग्री भित्रिएका छन्।

यस अवधिमा ५७ अर्ब ६६ करोड रुपैयाँ बराबरका मेसिनरी तथा पार्टपुर्जा तथा ५५ अर्ब सात करोड रुपैयाँ बराबरको भटमासको कच्चा तेल आयात भएको भन्सार कार्यालयले जनाएको छ।

आयातमा भएको यो वृद्धिले औद्योगिक कच्चा पदार्थ, ऊर्जा तथा निर्माण सामग्रीको माग बढिरहेको संकेत गरेको सरोकारवालाहरूको भनाइ छ।