बुधबार नेप्से परिसूचक दोहोरो अंकले घटेको छ।नेप्से २४.४५ अंकले घटेर २९३५.९४ विन्दुमा बन्द भएको छ।अघिल्लो दिनको तुलनामा कारोबार रकम भने बढेको छ। मंगलबार १४ अर्ब ८३ करोड रूपैयाँको सेयर कारोबार भएकोमा आज १५ अर्ब नौ करोड रूपैयाँ पुगेको छ। यसदिन ३४५ वटा धितोपत्रको तीन करोड ५८ लाख १९ हजार ८२९ कित्ता सेयर किनबेच भएको हो। 

बुधबार ४५ कम्पनीको सेयर मूल्य बढेको छ भने २१३ वटाको घटेको छ। यस्तै, सात कम्पनी स्थिर छन्।यसदिन पाँच कम्पनीमा सकारात्मक सर्किट लागेको छ।रिलायन्स स्पिनिङ मिल्स र सुपर खुदी हाइड्रोपावरको सेयर मूल्य १० प्रतिशत, सोलु हाइड्रोपावर, भुजुङ हाइड्रोपावर र होटल फरेस्ट इनको मूल्य ९.९९ प्रतिशतका दरले बढेको छ। सर्वाधिक मूल्य घट्नेमा अभियान लघुवित्त रहेको छ। उक्त कम्पनीको मूल्य ७.७४ प्रतिशतले घटेर प्रति कित्ता मूल्य एक २६० रूपैयाँमा झरेको छ।

यसैगरी, साल्पा विकास बैंकको मूल्य ६.९९ प्रतिशतले घटेर प्रति कित्ता मूल्य एक हजार ७१९ रूपैयाँमा सीमित भएको छ।बुधबार ङादी ग्रुप पावरको सर्वाधिक कारोबार भएको छ।उक्त कम्पनीको ४८४ रूपैयाँमा ५२ करोड ४७ लाख रूपैयाँको कारोबार भएको छ।यो मूल्य अघिल्लो दिनको तुलनामा १.४३ प्रतिशत घटेको हो।सर्वाधिक सेयर खरिद–बिक्री हुने दोस्रो सूचीमा अपी पावर रहेको छ। उक्त कम्पनीको ३५९ रूपैयाँमा ५१ करोड ९६ लाख रूपैयाँ बराबरको सेयर कारोबार भएको छ।आज कारोबारमा आएका १३ वटा समूहगत परिसूचकमध्ये दुई समूहको परिसूचक बढेको छ भने बाँकी ११ समूहको घटेको छ। यसमध्ये व्यापार समूहको परिसूचक सर्वाधिक ३.४५ प्रतिशतले बढेको छ।