प्रेस चौतारी नेपालका पूर्व अध्यक्ष राजेन्द्र अर्यालले नेकपा एमालेको ११ औँ महाधिवेशनमा केन्द्रीय सदस्य पदका लागि उम्मेदवारी दिने घोषणा गरेका छन्। अध्यक्ष केपी शर्मा ओलीप्रति निरन्तर समर्थन जनाउँदै आएका अर्यालले पार्टीप्रति निष्ठा, निरन्तरता र सक्रियताका आधारमा आफू स्वाभाविक दाबेदार भएको बताएका छन्।

शुक्रबार काठमाडौँमा सञ्चारकर्मीहरूसँग कुरा गर्दै उनले प्रेस चौतारी नेपाल पार्टीको प्रभावशाली जनसंगठन भए पनि नीति निर्माण तहमा प्रतिनिधित्व नहुँदा यसपटक चौतारीको तर्फबाट अग्रसर भएको बताए। उनले १० औँ महाधिवेशनमै केन्द्रीय सदस्यका प्रबल दाबेदार भए पनि नेतृत्वको आग्रहले पछि हट्नुपरेको स्मरण गरे।

‘म पार्टीबाट नबरालिएको मान्छे हो। हरेक चुनौती र सङ्कटमा दृढ भएर उभिएको छु,’ अर्यालले भने। प्रेस चौतारीको अध्यक्षसमेत भइसकेका उनी उपत्यका विशेष प्रदेश कमिटी, गुल्मी–काठमाडौँ सम्पर्क मञ्च, अनेरास्ववियुका विभिन्न जिम्मेवारीलगायत संगठन विस्तारमा निरन्तर सक्रिय रहेका छन्।

उनको अध्यक्षतामा प्रेस चौतारीले नेपाल पत्रकार महासङ्घ, सामुदायिक रेडियो प्रसारक सङ्घ, ब्रोडकास्टिङ एसोसिएसन अफ नेपाल (बान), सञ्चारिका समूह, आदिवासी जनजाति पत्रकार महासङ्घलगायतका संगठनमा विजय हासिल गरेको उल्लेखनीय इतिहास छ।

अध्यक्ष ओलीकै नेतृत्वमा पार्टी अघि बढ्नु आवश्यक रहेको दाबी गर्दै अर्यालले वर्तमान राजनीतिक सङ्कटको अवस्था समाधानका लागि पनि निरन्तरता महत्त्वपूर्ण हुने बताए। ‘पार्टीको मनोवृत्ति स्पष्ट छ—यो सङ्कटमा फेरि केही समय ओलीकै नेतृत्व आवश्यक छ,’ उनले भने।

एमालेको ११ औँ राष्ट्रिय महाधिवेशन शनिबारबाट सुरु हुँदैछ। उद्घाटन भक्तपुरको सल्लाघारीमा र बन्दसत्र काठमाडौँको भृकुटीमण्डपमा हुनेछ। महाधिवेशनमा अध्यक्ष पदमा केपी शर्मा ओली र ईश्वर पोखरेलबीच प्रतिस्पर्धा हुने देखिएको छ।