काठमाडौँ, ५ मंसिर – प्रधानमन्त्री सुशीला कार्कीसँग शुक्रबार हाम्रो पार्टी नेपालका अध्यक्ष खगेन्द्र सुनार नेतृत्वको टोलीले भेट गरेको छ।

प्रधानमन्त्री तथा मन्त्रिपरिषद् कार्यालयमा भएको भेटमा सुनारले निर्वाचन कानुनमा दलितमैत्री व्यवस्था गर्न प्रधानमन्त्री कार्कीलाई आग्रह गरेका हुन्। अध्यक्ष सुनारका अनुसार, समानुपातिक निर्वाचन प्रणालीले खस–आर्य समुदायलाई प्राथमिकता दिएको कारण दलित समुदायको पर्याप्त प्रतिनिधित्व हुन नसकेको छ।

भेटका क्रममा अध्यक्ष सुनारले प्रधानमन्त्रीले भोगेका आलोचना र चुनौतीप्रति क्षमा याचना गर्दै, विषम परिस्थितिमा मुलुक सम्हाल्न आउनुभएकोमा आभार व्यक्त गरे।

प्रधानमन्त्री कार्कीले सामाजिक न्याय र भेदभावमुक्त समाज निर्माणका लागि निरन्तर लागिरहनुपर्ने बताउँदै, चुनावमा पैसा र शक्तिको प्रभावले मात्रै नफर्कियोस् भनेर देशव्यापी जनजागरण आवश्यक रहेको सुझाव दिइन्। उनले वर्तमान सरकारको कार्यादेश भित्र दलित र उत्पीडित समुदायको अधिकतम प्रतिनिधित्व सुनिश्चित गर्न आफैं प्रयास गर्ने आश्वासन पनि दिइन्।