काठमाडौं — नेकपा एमालेको ११औँ महाधिवेशनको मतपरिणामले रोचक राजनीतिक चित्र देखाएको छ। अध्यक्ष पदमा केपी शर्मा ओली भारी मतान्तरसहित निर्वाचित भए पनि उनी केन्द्रीय सदस्य पदमा भने अप्रत्याशित रूपमा पराजित भएका छन्।

विधानले दिएको व्यवस्थाअनुसार अध्यक्षसँगै केन्द्रीय सदस्यमा समेत उम्मेदवारी दिएका ओलीले अध्यक्ष पदमा १ हजार ६ सय ६३ मत प्राप्त गर्दै सहज जित निकाले। तर खुला केन्द्रीय सदस्यतर्फ भने उनले ९ सय ७९ मत मात्र पाएर २८औँ स्थानमा सीमित भए, जसका कारण उनी केन्द्रीय सदस्यको सूचीबाट बाहिरिएका छन्।

एमाले केन्द्रीय निर्वाचन आयोगले सार्वजनिक गरेको अन्तिम मतपरिणामले अध्यक्ष र केन्द्रीय सदस्यतर्फ फरक–फरक परिणाम देखाएको हो।

यता अध्यक्ष पदमा ५ सय ६४ मत ल्याएर पराजित भएका ईश्वर पोखरेलले भने केन्द्रीय सदस्य पदमा सफलता हात पारेका छन्। खुला केन्द्रीय सदस्यतर्फ पोखरेल १ हजार ८८ मतसहित ९औँ स्थानमा रहँदै केन्द्रीय सदस्यमा निर्वाचित भएका हुन्।

महाधिवेशनको यो नतिजाले एमालेभित्रको आन्तरिक शक्ति सन्तुलन र प्रतिनिधिहरूको मत व्यवहारबारे नयाँ राजनीतिक बहस जन्माएको छ।