नेकपा एमालेका नेता कृष्ण कुमार श्रेष्ठ (किसान) को बारा जितपुर सिमरा नगरपालिकास्थित घरमा आफूलाई जेन-जीको नेता बनाउने सुदन गुरूङको समूह बिनाअनुमति छिरेको छ । 

बाराको सिमरामा यही मंसिर  ३ र ४ गते भएको झडपपछि अवस्था शान्त पार्ने कोसिस भइरहेका बेला सुदनले किसानको घरमा छिरेर धाक(धम्की दिएको आरोप लागेको छ।

नेकपा एमालेका नेता तथा बारा–४ का पूर्वप्रतिनिधि सभा सदस्य किसान भदौ २३ र २४ को घटनामा गहिरो दुःख व्यक्त गरेको सन्दर्भमा सुदनको समूह घरमै छिरेर धम्की दिएको खुलेको छ । 

श्रेष्ठका अनुसार पार्टी कामका लागि काठमाडौंमा रहेका बेला मंसिर ६ गते बिहान करिब ११ बजे जेन–जीका नेता भएको दाबी गर्ने सुदन गुरुङ नामक व्यक्ति उनको औराहास्थित घरमा प्रवेश गरी लुटपाट शैलीमा धम्क्याएका हुन् । 

उनका कर्मचारी र कामदारलाई भदौ २४ गते जलाइएका घर पुनर्निर्माण रोक्ने चेतावनी दिइएको उनले बताएका छन् । यसका साथै घर फेरि जलाइदिने धम्कीसमेत दिएको श्रेष्ठले बताएका छन्। उनले आफू सम्बद्ध नेतामाथि पनि केही पनि हुन सक्छ भन्ने धम्की आएको उल्लेख गरेका छन्।

श्रेष्ठले जेन–जी नाम प्रयोग गरेर भइरहेका गतिविधिले स्थानीय क्षेत्रमा आतंक फैलिएको भन्दै यसलाई रोक्न तथा शान्ति सुरक्षाको प्रत्याभूति दिन नेपाल सरकार र स्थानीय सरकारलाई तत्काल ध्यान दिन आग्रह गरेका छन्।