विराटनगर – नेकपा एमालेका नेता महेश बस्नेतमाथि विराटनगर विमानस्थलमा आइतबार बिहान रातो मसी फ्याँक्ने प्रयास गर्ने दुई युवामध्ये दुवै जना नेपाली कांग्रेसको भ्रातृसंगठन नेपाल विद्यार्थी संघ (नेविसंघ) का स्थानीय नेता रहेको खुलेको छ। बस्नेत विराटनगर विमानस्थलबाट उत्रिएर युवा संघको कोशी प्रदेशस्तरीय भेलामा भाग लिन इटहरीतर्फ जाने क्रममा बेलुनमा भरेको रातो मसी गाडीमाथि प्रहार गरिएको थियो।

आक्रमणमा संलग्न दुई युवामध्ये महेन्द्र मोरङ क्याम्पस नेविसंघ इकाइ सभापति **सञ्जोग गौतम** र सदस्य **अर्पित कुँवर** रहेको बस्नेतले पुष्टि गरेका छन्। उनले आफूलाई आक्रमण गर्ने व्यक्तिहरू नेविसंघका कार्यकर्ता भएको जानकारी कांग्रेसका नेताहरूबाट नै प्राप्त भएको बताए।

रातो मसी प्रहारपछि प्रहरीले तत्कालै विराटनगर–१ का सञ्जोग गौतम र विराटनगर–२ का अर्पित कुँवरलाई नियन्त्रणमा लिएको छ। गौतम नेविसंघ मोरङ जिल्ला कमिटीका सदस्यसमेत रहेका छन्। उनलाई डा. शेखर कोइराला र गगन थापा समूहले महेन्द्र मोरङ क्याम्पस इकाइ सभापति बनाएको खुलेको छ।

दुवैजनालाई प्रहरीले एमाले कार्यकर्ताको सहयोगमा नियन्त्रणमा लिएर जिल्ला प्रहरी कार्यालय मोरङमा राखी अनुसन्धान अघि बढाएको छ। घटना राजनीतिक तनाव बढ्ने संकेतका रूपमा हेरिएको छ।