काठमाडौँ, २२ कात्तिक — आम जनता पार्टीका अध्यक्ष तथा पूर्वमन्त्री प्रभु साहले नेकपा (एमाले) का अध्यक्ष केपी शर्मा ओलीमाथि २१ फागुनमा हुने चुनाव भाँड्न नयाँ–नयाँ षड्यन्त्र गरिरहेको आरोप लगाएका छन्।

शनिबार काठमाडौँमा आयोजित अन्तरक्रियामा साहले ओलीले प्रतिनिधिसभा पुनर्स्थापना गर्ने बहानामा आफ्नो दलका नेताहरूसँग हस्ताक्षर सङ्कलन अभियान चलाएको बताए र चुनावबाट नभाग्न चेतावनी दिए।

साहले जेनजी आन्दोलनमा चरम दमन गर्ने, युवाहरूको छाती र टाउकोमा गोली हान्नेहरूले नै अहिले चुनाव हुन नदिने चुनौती दिएको टिप्पणी गरे। उनले भने, “ओलीको दम्भकारी शासन र अहङ्कारको डरले एमाले चुनाव फेस गर्न डराएको हो। युवाहरूको हत्यामा संलग्न शासकहरूको मुख जनताले हेर्न नचाहेको छ।”

पूर्वमन्त्री साहले जेनजी आन्दोलनमा संलग्न अपराधीलाई कारबाही नपुगेको र सरकार तथा हत्याराबीचको नेक्सस देखिएको आरोप लगाए। उनले गृहमन्त्री ओमप्रकाश अर्याललाई ‘सस्तो लोकप्रियतामा रमाएको’ भन्दै आलोचना गरे र पूर्वराष्ट्रपतिहरूको जलेको घरको फोटो प्रचारबाजीभन्दा जेनजी हत्यारालाई छिटो कारबाही गर्न चुनौती दिए।

साहले जेनजी आन्दोलनकारीलाई छानी-छानी पक्राउ गर्ने तर हत्यारालाई उन्मुक्ति दिने प्रयासलाई ‘नाटक’ भन्दै, सुशीला कार्की नेतृत्वको सरकारले जेनजी आन्दोलनको गौरव धुमिल पार्ने उद्यत रहेको शंका व्यक्त गरे। उनले सरकारलाई २१ फागुनमा चुनाव सम्पन्न गराउने दायित्वबाट नफिर्ता हुने चेतावनी दिए।