काठमाडौँ उपत्यकाको प्रमुख धार्मिक तथा सांस्कृतिक पर्व इन्द्रजात्रा आज परम्परागत विधिअनुसार मनाइँदै छ। वर्षा, सहकाल र समृद्धिसँग जोडिएको इन्द्रजात्राको मुख्य आकर्षण जीवित देवी कुमारीको रथयात्रा हो। कुमारीको रथ काठमाडौँका पुराना बस्ती हुँदै नगर परिक्रमा गराइने परम्परा छ।

पर्वका क्रममा इन्द्रध्वज स्थापना तथा पूजा, भैरव, गणेश, कुमारीलगायत देवीदेवताका पूजाआजा र परम्परागत नृत्य तथा सांस्कृतिक प्रस्तुति हुने गर्छन्।

हिन्दु र बौद्ध परम्पराको समन्वय रहेको इन्द्रजात्रामा बौद्ध शाक्य समुदायबाट छनोट गरिने जीवित कुमारीलाई हिन्दु तथा बौद्ध दुवै समुदायले श्रद्धापूर्वक पूजा गर्ने परम्परा छ।

इन्द्रध्वजले विजय, शक्ति र समृद्धिको प्रतीकका रूपमा तथा कुमारी रथयात्राले जीवित देवीप्रतिको आस्थालाई प्रतिनिधित्व गर्ने भएकाले इन्द्रजात्रालाई काठमाडौँको मौलिक संस्कृति र सामाजिक एकताको महत्वपूर्ण पर्वका रूपमा लिइन्छ।