काठमाडौं । श्रम संस्कृति पार्टीका सांसदहरूले प्रधानमन्त्रीको नेपाल–भारत सीमा सम्बन्धी अभिव्यक्ति संसद्को रेकर्डबाट हटाउन माग गरेका छन् ।

बुधबार प्रतिनिधिसभा बैठक सुरु हुनेबित्तिकै श्रम संस्कृति पार्टीका सांसदहरूले उठेर विरोध जनाएपछि सभामुख डोलप्रसाद अर्यालले सांसद अम्बिका देवी संग्रौलालाई बोल्न समय दिएका थिए ।

सांसद संग्रौलाले गत जेठ १७ गते प्रधानमन्त्रीले संसद्को रोस्टमबाट नेपालले पनि भारतका विभिन्न ठाउँमा सीमा मिचेको भन्ने अभिव्यक्ति दिएको भन्दै त्यसलाई सच्याउनुपर्ने वा संसद्को रेकर्डबाट हटाउनुपर्ने माग गरिन् ।

उनले उक्त अभिव्यक्ति सच्याउन वा रेकर्डबाट हटाउन गरिएको माग लामो समयदेखि सम्बोधन नभएको भन्दै सभामुखमार्फत सरकारको ध्यानाकर्षण गराइन् ।