शुक्लफाँटा राष्ट्रिय निकुञ्जका कारण विस्थापित भएका परिवारहरूको समस्या सम्बोधन गरिने भएको छ।

कृषि, वन तथा पर्यावरणमन्त्री गीता चौधरीले विस्थापित परिवारको समस्या समाधानका लागि गठित समितिको सिफारिसका आधारमा आवश्यक कदम चालिने जानकारी दिएकी छन्।

मन्त्री चौधरीका अनुसार समस्याको दीर्घकालीन समाधान खोज्न चार सदस्यीय कार्यदल गठन गरिएको छ। उक्त कार्यदलले एक महिनाभित्र विस्थापित परिवारहरूको उचित व्यवस्थापनका लागि मार्गचित्र तयार गरी समाधानका उपाय तथा प्रक्रियासहितको सिफारिस पेश गर्नेछ।

वन्यजन्तु सिकार आरक्षदेखि राष्ट्रिय निकुञ्जमा स्तरोन्नति गर्ने क्रममा निकुञ्ज क्षेत्रभित्र रहेका बस्ती स्थानान्तरण गर्दा उत्पन्न भएका समस्याहरू अझै समाधान हुन नसकेको भन्दै विस्थापित परिवारहरूको व्यवस्थापनलाई प्राथमिकतामा राखिएको मन्त्री चौधरीले बताइन्।

उनका अनुसार समितिको प्रतिवेदनपछि आवश्यक नीति तथा कार्यक्रम अघि बढाइनेछ।