ललितपुर — नेपाली कला, संस्कृति तथा धार्मिक सम्पदाप्रति जनचेतना अभिवृद्धि गर्ने उद्देश्यले पाल्पासा आर्ट ग्यालरीले बालकुमारीमा धार्मिक तथा सांस्कृतिक विषयवस्तु समेटिएको भित्तेचित्र निर्माण गरेको छ।

भित्तेचित्रमा नेपालका विविध धार्मिक आस्था, सांस्कृतिक परम्परा, मौलिक जीवनशैली तथा सामाजिक सहअस्तित्वलाई कलात्मक रूपमा प्रस्तुत गरिएको छ। चित्रमार्फत नेपाली समाजको सांस्कृतिक विविधता र धार्मिक सहिष्णुताको सन्देश प्रवाह गरिएको छ।

तीव्र शहरीकरण र आधुनिकीकरणका कारण ओझेलमा पर्दै गएका सांस्कृतिक मूल्य, परम्परा र मौलिक पहिचानलाई दृश्यकलामार्फत संरक्षण र प्रवर्द्धन गर्ने उद्देश्यले भित्तेचित्र तयार गरिएको जनाइएको छ।

सार्वजनिक स्थलमा निर्माण गरिएको उक्त कलाकृतिले स्थानीयवासी तथा सर्वसाधारणको ध्यान आकर्षित गर्नुका साथै नेपाली कला, संस्कृति र धार्मिक सम्पदाको संरक्षणमा दृश्यकलाको महत्वपूर्ण भूमिका रहेको सन्देश दिएको छ।