उबरले नेपालमा आधिकारिक सेवा सुरु गर्यो, एसिया–प्रशान्तको ११औँ बजारमा प्रवेश
काठमाडौं — विश्वप्रसिद्ध राइड–हेलिङ सेवा प्रदायक कम्पनी Uber ले नेपालमा आफ्नो आधिकारिक सेवा सुरु गरेको घोषणा गरेको छ।
यससँगै नेपाल एसिया–प्रशान्त क्षेत्रभित्र उबरको ११औँ बजार बनेको छ भने दक्षिण एसियामा पछिल्लो दशकयता कम्पनीले प्रवेश गरेको पहिलो नयाँ बजार पनि बनेको छ।
कम्पनीका अनुसार नेपालमा सुरुआती चरणमा चारपाङ्ग्रे सवारीका लागि ‘Uber Go’ र ‘Uber Comfort’ तथा दुईपाङ्ग्रे सवारीका लागि ‘Uber Bike’ सेवा उपलब्ध हुनेछ। यी सेवामार्फत यात्रुले सहज, भरपर्दो र सुविधाजनक यात्राको अनुभव लिन सक्ने कम्पनीको दाबी छ।
उबरका एपीएसी क्षेत्रीय महाप्रबन्धक डोनिक टेलरले नेपाललाई तीव्र गतिमा डिजिटल रूपान्तरण भइरहेको, सहरी गतिशीलता विस्तार भइरहेको तथा पर्यटन क्षेत्रमा उच्च सम्भावना बोकेको बजारका रूपमा वर्णन गरेका छन्। उनले नेपालमा प्रवेश कम्पनीको विश्वव्यापी विस्तार यात्राको महत्वपूर्ण उपलब्धि भएको बताएका छन्।
संस्कृति, पर्यटन तथा नागरिक उड्डयन मन्त्रालयका सचिव मुकुन्दप्रसाद निरौलाले उबरको आगमनले नेपालको पर्यटन क्षेत्रलाई थप सुदृढ बनाउने विश्वास व्यक्त गरेका छन्। उनका अनुसार अन्तर्राष्ट्रिय पर्यटक तथा स्वदेशी यात्रुका लागि सहज यातायात उपलब्ध हुनु पर्यटन प्रवर्द्धनका लागि सकारात्मक कदम हुनेछ।
त्यस्तै भौतिक पूर्वाधार तथा यातायात मन्त्रालयका सचिव गोपालप्रसाद सिग्देलले उबरको प्रवेशलाई आधुनिक, डिजिटल तथा समावेशी यातायात प्रणाली निर्माणतर्फको महत्वपूर्ण उपलब्धिका रूपमा व्याख्या गरेका छन्। उनले यसले सहरी गतिशीलता सुधार, रोजगारी सिर्जना तथा आर्थिक गतिविधि विस्तारमा योगदान पुर्याउने बताएका छन्।
उबर हाल विश्वका ७० भन्दा बढी देशमा सञ्चालनमा रहेको कम्पनी हो। नेपालमा स्मार्टफोन प्रयोग बढ्दै गएको, सहरी यातायातको माग बढिरहेको र पर्यटन क्षेत्र विस्तार हुँदै गएको कारण सेवा सुरु गरिएको कम्पनीले जनाएको छ।
