काठमाडौं, ३१ जेठ — काठमाडौं महानगरपालिका ले फोहोर व्यवस्थापनलाई दिगो, व्यवस्थित र आधुनिक बनाउने उद्देश्यसहित ‘पोलुटर्स पे प्रिन्सिपल’ लागू गर्ने तयारी गरेको छ। आगामी आर्थिक वर्ष २०८३/०८४ को नीति तथा कार्यक्रममा फोहोर उत्पादन गर्ने व्यक्ति वा संस्थाले नै त्यसको व्यवस्थापनको लागत व्यहोर्नुपर्ने व्यवस्था गरिने उल्लेख गरिएको छ।

महानगरका अनुसार फोहोरको प्रकृति र परिमाणका आधारमा सेवा शुल्क निर्धारण गरिनेछ। यसले बढी फोहोर उत्पादन गर्नेबाट बढी शुल्क लिने तथा फोहोर न्यूनीकरण गर्न प्रोत्साहन गर्ने अपेक्षा गरिएको छ।

नीति तथा कार्यक्रममा फोहोरलाई स्रोतबाटै वर्गीकरण गर्ने, पुनः प्रयोग (Reuse) बढाउने र पुनर्चक्रण (Recycling) लाई प्राथमिकता दिने योजना पनि समावेश गरिएको छ। जैविक फोहोरबाट कम्पोस्ट मल उत्पादनलाई प्रोत्साहन गर्दै कृषि क्षेत्रमा यसको प्रयोग विस्तार गर्ने लक्ष्य राखिएको महानगरले जनाएको छ।

त्यस्तै, फोहोरमैला व्यवस्थापनमा गैरसरकारी संस्था तथा निजी क्षेत्रसँगको सहकार्य विस्तार गरिनेछ। आवश्यक उपकरण तथा पूर्वाधार निर्माणसँगै जैविक र अजैविक फोहोरको छुट्टाछुट्टै संकलन, ढुवानी तथा प्रशोधन प्रणालीलाई थप सुदृढ बनाइने महानगरको योजना छ।

महानगरले यी कार्यक्रममार्फत फोहोर व्यवस्थापनलाई प्रभावकारी बनाउनुका साथै वातावरण संरक्षण र स्रोतको पुनः उपयोगलाई प्रवर्द्धन गर्ने अपेक्षा गरेको छ।