काठमाडौं — सर्वोच्च अदालतका न्यायाधीश तिलप्रसाद श्रेष्ठ ले आफ्नो उपचारका लागि भइरहेको आर्थिक सहयोग सङ्कलन तत्काल रोक्न आग्रह गरेका छन्।

जारी गरिएको प्रेस विज्ञप्तिमार्फत उनले आफ्नो उपचारका नाममा विभिन्न माध्यमबाट आर्थिक सहयोग सङ्कलन भइरहेको जानकारी आफूले पाएको उल्लेख गर्दै उक्त कार्य तत्काल स्थगित गर्न सबैसँग विनम्र अनुरोध गरेका हुन्।

विज्ञप्तिमा उनले न्याय सेवा अधिकृत समाजले न्यायपालिकामा कार्यरत राष्ट्रसेवक कर्मचारीहरूलाई स्वेच्छिक आर्थिक सहयोग गर्न आह्वान गरेको जानकारी पनि आफूले पाएको बताएका छन्।

उनले भनेका छन्, “यो आर्थिक सङ्कलनको कार्य स्थगित गरिदिनुहुन सबैमा मेरो विनम्र अनुरोध छ। आशा छ, तपाईंहरूले मेरो अनुरोधलाई स्वीकार गरी रकम सङ्कलनको कार्य स्थगित गर्नुहुनेछ।”

बोनम्यारोसम्बन्धी समस्याबाट पीडित न्यायाधीश श्रेष्ठ हाल भारतको राजीव गान्धी क्यान्सर संस्थान तथा अनुसन्धान केन्द्रमा उपचाररत छन्।