(लमजुङ) : राष्ट्रिय स्वतन्त्र पार्टी (रास्वपा) लमजुङको विस्तारित बैठकमा प्रतिनिधिसभा सदस्य माननीय धर्मराज केसीले पार्टीलाई पूर्ण रूपमा विधि र पद्धतिमा चलाउनुपर्नेमा जोड दिनुभएको छ। बैठकलाई सम्बोधन गर्दै सांसद केसीले पार्टी सभापति एवम् प्रधानमन्त्रीसँगको साढे आधा घण्टा लामो व्यक्तिगत छलफलका क्रममा पनि विधि र पद्धतिकै विषयमा गम्भीर कुराकानी भएको जानकारी दिनुभयो।

उहाँले पार्टीको नीति, विधि र पद्धतिभन्दा बाहिर जाने जोकसैलाई पनि पार्टीले काँध थाप्न नसक्ने स्पष्ट पार्नुभयो।स्थानीय तहको आगामी निर्वाचनलाई लक्षित गर्दै सांसद केसीले लमजुङका पालिका तथा वडा स्तरका नेता-कार्यकर्ताहरूलाई पदको महत्त्वाकाङ्क्षा नराख्न र अफवाह नफैलाउन कडा निर्देशन दिनुभयो। "म गाउँपालिका अध्यक्ष बन्छु वा मेयर बन्छु भन्दै अफवाह फैलाउने र पार्टीलाई बदनाम गराउने काम कसैले नगरौँ," उहाँले भन्नुभयो, "उम्मेदवार बन्न बजारमा हल्ला गर्दै हिँड्ने होइन, अरूभन्दा कसरी अब्बल र सक्षम बन्न सकिन्छ भनेर काममा जुट्नुस्, पार्टीले सक्षम व्यक्तिलाई नै मूल्याङ्कन गरेर टिकट दिनेछ।"

मनोनयन दर्ताको केही घण्टा अघि मात्र उम्मेदवारी टुङ्गो लाग्ने भएकाले अहिलेदेखि नै पदको दाबी गर्दै नहिँड्न उहाँले ध्यानाकर्षण गराउनुभयो।प्रतिनिधिसभामा पार्टीको उपस्थिति र जिम्मेवारीबारे बोल्दै सांसद केसीले १८२ सिटसहितको शक्ति हुँदा पनि काम गरेर नदेखाए आगामी चुनावपछि जनताले गाउँ छिर्न नदिने चेतावनी दिनुभयो। अहिले सांसदहरू कानुन र विधि निर्माणमा निरन्तर व्यस्त रहेको बताउँदै स्पष्ट कानुनको अभाव र गलत व्याख्याका कारण जनताले साना-साना काममा पनि सास्ती व्यहोर्नु परेको उहाँको भनाइ थियो। आगामी एक-दुई वर्षभित्र सर्वसुलभ कानुन र सुदृढ विधि निर्माण गरिसकेपछि विकास निर्माणका कामलाई थप तीव्र गतिमा अघि बढाउने उहाँले प्रतिबद्धता जनाउनुभयो।

यसैगरी स्थानीय तहका समस्या र कामहरूबारे बोल्दै उहाँले साना-साना स्थानीय काममा पनि सांसदलाई फोन गर्ने परिपाटी रहेको उल्लेख गर्नुभयो। आगामी स्थानीय निर्वाचनमा रास्वपाका तर्फबाट मेयर, अध्यक्ष तथा वडा अध्यक्षहरूलाई विजयी गराएर स्थानीय स्तरका सम्पूर्ण सेवा र विकासका कामहरू स्थानीय सरकारबाटै चुस्त-दुरुस्त रूपमा सम्पादन गराउने दाबी सांसद केसीले गर्नुभयो।