बेँसीसहर (लमजुङ) : राष्ट्रिय स्वतन्त्र पार्टी (रास्वपा) लमजुङको विस्तारित बैठकमा जिल्ला सदस्य भोला शर्माले "व्यक्ति होइन, विचार बलियो बनाऔँ; संगठन मात्रै होइन, संगठनसँगै जनविश्वास बलियो बनाऔँ" भन्ने मूल नाराका साथ आफ्ना महत्वपूर्ण विचार तथा राजनीतिक मन्तव्य व्यक्त गर्नुभएको छ। उहाँले लमजुङमा रास्वपालाई केवल अर्को एउटा पार्टी मात्र नबनाई पुरानो राजनीतिक संस्कारप्रति नागरिक असन्तुष्टिको सही विकल्प र परिणाममुखी राजनीतिक शक्तिका रूपमा स्थापित गर्न स्पष्ट कार्यदिशा प्रस्तुत गर्नुभएको छ।

मन्तव्यका क्रममा शर्माले जनताले खोजेको परिवर्तन सरकार फेर्नका लागि मात्र नभई शासन गर्ने शैली, राजनीतिक संस्कार, जवाफदेहिता र परिणाम दिने क्षमतामा हुनुपर्ने बताउनुभयो। प्रथम जिल्ला अधिवेशन सम्पन्न भई नयाँ नेतृत्व चयन भएसँगै वास्तविक संगठन निर्माणको काम सुरु भएको उल्लेख गर्दै उहाँले अब कागजी संरचनाबाट बाहिर निस्किएर "हरेक वडा-हरेक टोल-हरेक नागरिकसँग सम्बन्ध" को नीति लिनुपर्नेमा जोड दिनुभयो।आन्तरिक एकता र राजनीतिक संस्कारबारे बोल्दै उहाँले "मत फरक हुन सक्छ, मन फरक हुनु हुँदैन; प्रतिस्पर्धा हुन सक्छ, विभाजन हुनु हुँदैन" भन्ने मान्यता स्थापित गर्नुपर्ने बताउनुभयो। गुटबन्दी र व्यक्तिपूजाको अन्त्य गर्दै संस्थागत निर्णय, सहकार्य, र नेतृत्वलाई सच्याउने स्वस्थ आलोचनात्मक वातावरण बनाउनुपर्ने उहाँको भनाइ थियो। नेता-कार्यकर्ता पार्टी कार्यालयमा मात्र सीमित नभई गाउँ-टोल पुगेर नियमित जनसंवाद, सार्वजनिक सुनुवाइ, नागरिक सहायता तथा गुनासो डेस्क सञ्चालन र विकास आयोजनाको निगरानीमा लाग्नुपर्ने उहाँले औँल्याउनुभयो।

लमजुङको समृद्धिका लागि शर्माले गुणस्तरीय शिक्षा, सर्वसुलभ स्वास्थ्य, युवा पलायन रोक्ने उद्यमशीलता, कृषिको बजारीकरण, एकीकृत पर्यटन विकास, गुणस्तरीय पूर्वाधार र स्थानीय सरकारमा सुशासनलाई पार्टीका मूल राजनीतिक मुद्दाका रूपमा अघि सार्नुभयो। आगामी स्थानीय निर्वाचनको तयारी आजैदेखि सुरु गर्नुपर्ने बताउँदै उहाँले वडागत अवस्था अध्ययन, बूथस्तरीय संगठन, स्थानीय मुद्दामा आधारित प्रतिबद्धता-पत्र र काम गर्न सक्ने नेतृत्वको पहिचानमा जुट्न आग्रह गर्नुभयो।नयाँ पुस्ता र पारदर्शिताको विषयमा बोल्दै उहाँले युवालाई केवल चुनावमा परिचालन गर्ने नभई नीति निर्माण र नेतृत्वमै समान अवसर दिनुपर्ने बताउनुभयो। अरू दलसँग पारदर्शिताको प्रश्न उठाउनुअघि आफ्नै संगठनभित्र आर्थिक र निर्णय प्रक्रियामा पारदर्शिता कायम गर्नुपर्ने उहाँको जोड थियो।

मन्तव्यको अन्त्यमा उहाँले संगठन निर्माण, जनसंवाद, मुद्दा पहिचान, नेतृत्व विकास र निर्वाचन तयारी गरी ५ वटा अभियान सञ्चालन गर्न प्रस्ताव गर्नुभयो। "एकता हाम्रो शक्ति, संगठन हाम्रो आधार, जनता हाम्रो केन्द्र र परिणाम हाम्रो राजनीति" भन्ने साझा संकल्पका साथ भाषण र नारामा मात्र नभई नतिजा दिने गरी काम गर्न जिल्ला सदस्य शर्माले बैठकमा सहभागी सबैमा आह्वान गर्नुभयो।