निर्माण क्षेत्रलाई व्यवस्थित र चलायमान बनाउने उद्देश्यसहित ‘घर निर्माण फेस्ट’को नयाँ संस्करण आगामी पुस ९ देखि १२ गतेसम्म काठमाडौँको भृकुटीमण्डपमा आयोजना हुने भएको छ। फेस्टको आयोजना घर निर्माण फाउन्डेसनले गर्न लागेको हो र हालका लागि स्टल बुकिङ पनि खुला गरिएको छ।

यसअघि गत पुस १२ देखि १५ गतेसम्म पहिलो संस्करण सफलतापूर्वक सम्पन्न गरिएको थियो।

यस पटकको फेस्टमा १५० भन्दा बढी स्टल रहने आयोजकले जनाएको छ। निर्माण क्षेत्रमा संलग्न कम्पनी, सेवा प्रदायक तथा संस्थाहरूले आफ्ना उत्पादन र सेवाहरू प्रदर्शन तथा प्रवर्द्धन गर्न स्टल राख्न सक्नेछन्।

चार दिनसम्म चल्ने फेस्टमा प्रत्यक्ष अन्तरक्रिया, विशेषज्ञ मार्गदर्शन तथा ब्रान्डिङ परामर्श जस्ता कार्यक्रम हुनेछन्। निर्माण व्यवसायी, इन्जिनियर, आर्किटेक्ट तथा सरोकारवालाबीच निर्माण क्षेत्रका समस्या र समाधानबारे छलफल गरिनेछ।

आयोजकका अनुसार अवलोकनकर्ताले कम लागतमा गुणस्तरीय निर्माण, नयाँ प्रविधि, डिजाइन र निर्माणका क्रममा अपनाउनुपर्ने सावधानीबारे जानकारी पाउनेछन्। साथै इन्जिनियर तथा विशेषज्ञबाट निःशुल्क परामर्श सेवा समेत उपलब्ध हुनेछ।

फेस्टले अव्यवस्थित निर्माण क्षेत्रलाई व्यवस्थित बनाउने, आर्थिक गतिविधि चलायमान गर्ने तथा दक्ष जनशक्ति र निर्माण कम्पनीबीच सम्बन्ध सुदृढ गर्ने लक्ष्य लिएको आयोजकको भनाइ छ।