काठमाडौँ — देशका विभिन्न स्थानमा आएको हुरीका कारण रुख ढल्दा विद्युत् प्रसारण लाइनमा क्षति पुगेर अस्थायी रूपमा आपूर्ति अवरुद्ध भएको छ। नेपाल विद्युत् प्राधिकरणले प्रभावित क्षेत्रमा मर्मत तथा पुनःसञ्चालनको काम तीव्र रूपमा भइरहेको जनाएको छ।

प्राधिकरणका अनुसार प्रतिकूल मौसमका कारण रुख ढल्दा केही प्रसारण लाइनमा अवरोध उत्पन्न भएको हो। प्रभावित क्षेत्रमा प्राविधिक टोलीहरू निरन्तर खटिएर मर्मत तथा पुनःसञ्चालनको कार्य अघि बढाइरहेका छन्।

ऊर्जा, जलस्रोत तथा सिँचाइमन्त्री विराजभक्त श्रेष्ठ ले तत्काल मर्मत कार्य अघि बढाउन प्राधिकरणका पदाधिकारीलाई निर्देशन दिएका छन्।

विवरणअनुसार पिलुवा–पथलैया–चन्द्रनिगाहपुर खण्डको टावर नं. १२२–१२३ बीच रुख ढलेर प्रसारण लाइन प्रभावित भएको थियो, जहाँ रुख हटाउने कार्य सम्पन्न भइसकेको छ र हाल सर्किट चार्ज गर्ने काम भइरहेको छ।

त्यसैगरी सोही खण्डको टावर नं. १३६–१३७ बीचका तीन वटा रुख हटाइसकिएको छ भने लाइन पुनः सञ्चालनका लागि आवश्यक प्राविधिक कार्य जारी छ।

अमलेखगञ्ज–कामाने खण्डको टावर नं. ४६–४७ बीच रुख ढल्दा प्रसारण लाइनको कन्डक्टरमा क्षति पुगेको छ। मर्मतका लागि प्राविधिक टोली घटनास्थलमा पुगिसकेको र ‘स्ट्रिङिङ’ कार्य सुरु गरिएको प्राधिकरणले जनाएको छ।

हुरीका कारण आइतबार देशका विभिन्न स्थानमा विद्युत् आपूर्तिमा समस्या आएको थियो भने सोमबार बिहानसम्म सेवा सामान्य बनाउने प्रयास भइरहेको प्राधिकरणले जनाएको छ।