३० पुस, काठमाडौं — महान्यायाधिवक्ता कार्यालयले पूर्व गृहमन्त्री रवि लामिछानेविरुद्ध विभिन्न जिल्ला अदालतमा दायर गरिएका संगठित अपराध र सम्पत्ति शुद्धिकरणसम्बन्धी अभियोग फिर्ता लिन सम्बन्धित सरकारी वकिलहरूलाई स्वीकृति दिएको छ।

महान्यायाधिवक्ता कार्यालयको निर्णयसँगै कास्की, रुपन्देही, काठमाडौं र पर्सा जिल्ला अदालतमा चलिरहेका संगठित अपराध तथा सम्पत्ति शुद्धिकरणका मुद्दामा अभियोग फिर्ता लिने प्रक्रिया अघि बढाइने भएको छ।

महान्यायाधिवक्ता सबिता भण्डारी बरालले सहकारी ठगीसम्बन्धी मुद्दा भने यथावत् रहने स्पष्ट पारिन्। उनले अनलाइनखबरसँग भनिन्, “सहकारी ठगीको मुद्दा कायम नै छ। संगठित अपराध र सम्पत्ति शुद्धिकरणको अभियोग फिर्ता लिने गरी मात्रै अभियोगपत्र संशोधन गर्न स्वीकृति दिइएको हो। यसलाई मुद्दा फिर्ता लिएको रूपमा बुझ्न हुँदैन।”

बरालले बुधबार चारवटा जिल्ला अदालतमा विचाराधीन अभियोगपत्र संशोधन गर्न स्वीकृति दिने निर्णय गरेकी थिइन्। सो निर्णयपछि कास्की जिल्ला अदालतमा चलिरहेको संगठित अपराध र सम्पत्ति शुद्धिकरणको मुद्दा फिर्ता हुनेछ।

त्यस्तै, रुपन्देही, काठमाडौं र पर्सा जिल्ला अदालतमा चलिरहेको संगठित अपराधसम्बन्धी मुद्दा पनि फिर्ता लिइनेछ।

तर चितवन जिल्ला अदालतमा संगठित अपराध तथा सम्पत्ति शुद्धिकरणसम्बन्धी कुनै पनि मुद्दा नचलिरहेको हुँदा त्यहाँ अभियोगपत्र संशोधन गर्ने निर्णय गरिएको छैन।