काठमाडौं — विश्वकपको राउन्ड अफ १६ को खेलमा अर्जेन्टिनासँग ३–२ ले पराजित भएपछि इजिप्टले खेल अधिकारीहरूको निर्णयमाथि गम्भीर प्रश्न उठाएको छ।

एटलान्टामा भएको खेलमा साविक विजेता अर्जेन्टिनाले पुनरागमन गर्दै जित निकाले पनि खेलका केही विवादास्पद निर्णयका कारण भीएआर (भिडियो असिस्टेन्ट रेफ्री) को भूमिकामाथि बहस सुरु भएको हो।

खेलको ५८औँ मिनेटमा इजिप्टले गरेको दोस्रो गोललाई भीएआरको समीक्षा पछि अमान्य घोषित गरिएको थियो। तर खेलको अन्तिम समयमा अर्जेन्टिनाले निर्णायक तेस्रो गोल गर्नुअघि इजिप्टका मोहमद सलाहमाथि भएको भनिएको फउलमा भने भीएआरले हस्तक्षेप नगरेको भन्दै इजिप्टले आपत्ति जनाएको छ।

इजिप्टका मुख्य प्रशिक्षक होसाम हसनले फिफा र रेफ्रीहरूले अर्जेन्टिनाका कप्तान लियोनेल मेसीजस्ता ठूला स्टार तथा साविक विजेता टोलीलाई फाइदा पुग्ने गरी दबाबमा काम गरेको आरोप लगाएका छन्। उनले मैदान बाहिरका शक्तिहरूले खेलमा प्रभाव पारेको र अर्जेन्टिनालाई विभिन्न स्तरबाट सहयोग पुगेको दाबी गरे।

यस घटनापछि खेल सञ्चालन र रेफ्री निर्णयको निष्पक्षतामाथि पनि बहस बढेको छ। केही खेल विश्लेषकहरूले इजिप्टको गोल रद्द गर्ने निर्णयमा प्रयोग गरिएको मापदण्ड र अर्जेन्टिनाको तेस्रो गोलअघि भएको भनिएको फउलमा भीएआरको मौनताबीच असमानता देखिएको बताएका छन्।

पोर्चुगिज फुटबल प्रशिक्षक जोसे मौरिन्होले समेत उक्त खेलको निर्णयप्रति असन्तुष्टि जनाउँदै खेल ‘दिउँसै लुटिएको’ टिप्पणी गरेका छन्।

यसैबीच, अमेरिकी राजनीतिक घटनाक्रम र अर्जेन्टिनासँग जोडिएका कूटनीतिक सम्बन्धका कारण पनि केही विश्लेषकहरूले सम्भावित पूर्वाग्रहबारे प्रश्न उठाएका छन्। यद्यपि खेल अधिकारी वा फिफाले भने यी आरोपबारे औपचारिक प्रतिक्रिया दिएको छैन।

इजिप्टको हारसँगै अर्जेन्टिना विश्वकपको अर्को चरणमा प्रवेश गरेको छ भने भीएआर निर्णयको पारदर्शिता र समान प्रयोगबारे बहस थप चर्किएको छ।