२ माघ, काठमाडौं । सरकारले सहकारी क्षेत्रमा देखिएको बेथिति छानबिन गर्न जाँचबुझ आयोग गठन गरेको छ।

आज साँझ बसेको मन्त्रिपरिषद् बैठकले उच्च अदालतका पूर्वन्यायाधीश विनोदप्रसाद शर्माको संयोजकत्वमा आयोग गठन गर्ने निर्णय गरेको हो। सरकारका प्रवक्ता तथा सञ्चारमन्त्री जगदीश खरेलले बैठकपछि आयोजित पत्रकार सम्मेलनमा सो निर्णय सार्वजनिक गरे।

उनका अनुसार आयोगले सहकारी संस्थामा देखिएका अनियमितता, वित्तीय बेथिति तथा व्यवस्थापनसम्बन्धी कमजोरीहरूको अध्ययन गरी सरकारलाई सुझाव दिनेछ। आयोगको कार्यक्षेत्र, समयावधि तथा सदस्यहरूको विवरण भने छिट्टै सार्वजनिक गरिने सरकारको भनाइ छ।

हालै विभिन्न सहकारी संस्थामा बचतकर्ताको रकम जोखिममा परेको, अपारदर्शी कारोबार भएको तथा नियमन कमजोर भएको गुनासो बढ्दै गएपछि सरकारले छानबिनका लागि आयोग गठन गरेको हो।