काठमाडौं । स्ट्रेट अफ होर्मुज नजिक ओमानको तटमा एउटा तेल ट्यांकरमाथि अज्ञात प्रहार भएपछि आगलागी भएको बेलायती समुद्री सुरक्षा एजेन्सी युकेएमटीओले जनाएको छ।

युकेएमटीओका अनुसार ओमानको लिमाहबाट करिब आठ माइल पूर्वमा रहेको ट्यांकरमा बन्दरगाहतर्फ अज्ञात वस्तु प्रहार भएपछि आगलागी भएको हो। घटनामा हालसम्म मानवीय क्षति वा वातावरणीय क्षतिको विवरण सार्वजनिक भएको छैन।

एजेन्सीले जहाजहरूलाई सावधानीपूर्वक आवतजावत गर्न र कुनै पनि शंकास्पद गतिविधिबारे जानकारी गराउन आग्रह गरेको छ। घटनाबारे अधिकारीहरूले अनुसन्धान गरिरहेका छन्।

यसैबीच, अमेरिकी सञ्चारमाध्यम एक्सियोसले अमेरिकी अधिकारीहरूलाई उद्धृत गर्दै इरानले व्यापारिक जहाजमा कम्तीमा दुईवटा मिसाइल प्रहार गरेको दाबी गरेको छ।

होर्मुज जलडमरूमध्य विश्वकै महत्वपूर्ण ऊर्जा ढुवानी मार्गमध्ये एक हो। यस क्षेत्रमा भएको तनावले विगतमा विश्वव्यापी ऊर्जा बजारमा समेत असर पारेको थियो।