काठमाडौं — नेपाली कम्युनिष्ट पार्टी (नेकपा) का नेता वामदेव गौतम फागुन २१ गते हुने प्रतिनिधिसभा निर्वाचनमा उम्मेदवार बन्ने भएका छन्।

हाल राष्ट्रिय सभाका सदस्य रहेका गौतमलाई नेकपाले बर्दिया निर्वाचन क्षेत्र नम्बर १ बाट प्रतिनिधिसभा सदस्यका लागि प्रत्यक्षतर्फ उम्मेदवार बनाउने निर्णय गरेको छ। सोही प्रयोजनका लागि उनले आइतबार राष्ट्रिय सभा सदस्य पदबाट राजीनामा दिने तयारी गरेका छन्।

नेकपाका संयोजक पुष्पकमल दाहालले गौतमलाई बर्दिया–१ बाट निर्वाचन लड्न सुझाएका हुन्। चुनावी तयारीका लागि गौतम हाल बर्दियामा सक्रिय रूपमा खटिइरहेका छन्।

यसअघि २०७४ सालको प्रतिनिधिसभा निर्वाचनमा गौतम नेपाली कांग्रेसका नेता सञ्जयकुमार गौतमसँग पराजित भएका थिए। सो निर्वाचनपछि उनले आफूलाई एमाले अध्यक्ष केपी शर्मा ओलीले योजनाबद्ध रूपमा हराएको भन्दै सार्वजनिक आरोप लगाएका थिए। प्रधानमन्त्रीमा दाबी गरेपछि ओलीले एमालेका नेता सूर्य थापालगायतलाई बर्दिया पठाएर आफूलाई पराजित गराएको आरोप उनले लगाएका थिए।

वामदेव गौतम करिब चार वर्ष एमालेबाहिर रहेपछि गत कात्तिक १९ गते नेकपामा प्रवेश गरेका थिए। पार्टी प्रवेशका क्रममा उनले नेकपाका लागि एक करोड मत ल्याएर बहुमतसहितको पहिलो दल बनाउने दाबी गरेका थिए।

उता बर्दिया निर्वाचन क्षेत्र नम्बर २ बाट २०७९ सालको निर्वाचनमा नागरिक उन्मुक्ति पार्टीबाट निर्वाचित लालवीर चौधरी पनि नेकपाबाट टिकट लिने तयारीमा रहेका छन्। नागरिक उन्मुक्ति पार्टी हाल नेकपामा गाभिएको अवस्था छ।