भद्रपुर, झापा — शुक्रबार राति भद्रपुर विमानस्थलमा बुद्ध एयरको जहाज रनवेबाट चिप्लिएर दुर्घटनामा परेको घटनामा पाँचथरका उमेश मोक्तानको साहसले ५१ जना यात्रुको ज्यान जोगिएको छ।

जहाज दुर्घटनास्थलमा रोकिएपछि यात्रुहरू जहाजभित्रै अड्किएका थिए। इमरजेन्सी ढोका तत्काल नखुल्दा अवस्था झन् तनावपूर्ण बन्दै गएको थियो। यात्रुहरू त्रसित अवस्थामा रहेका बेला उमेश मोक्तानले साहस देखाउँदै आफैंले इमरजेन्सी ढोका खोलेका थिए।

उमेशका अनुसार एयर होस्टेसहरूले ढोका नखोल्न आग्रह गरे पनि उनले जोखिम मोलेर ढोका खोले। “ढोका नखोलेको भए यात्रुहरू किचिन सक्थे, धेरै घाइते वा ज्यान जाने अवस्था आउन सक्थ्यो,” उनले बताए।

ढोका खुलेपछि सबै यात्रुहरू सुरक्षित रूपमा बाहिर निस्किन सफल भएका थिए। उक्त घटनापछि यात्रुहरू र स्थानीयवासीले उमेश मोक्तानको साहस र तत्परताको खुलेर प्रशंसा गरेका छन्।