मन्त्री सुधन गुरुङले आफ्नै पार्टीका सांसदहरूको दोहोरो अभिव्यक्तिप्रति असन्तुष्टि जनाएका छन्। सांसदहरूले सार्वजनिक रूपमा एउटा कुरा गर्ने तर पछाडि गएर फरक धारणा राख्ने प्रवृत्ति उचित नभएको उनले बताएका हुन्।

उनले सांसदहरूलाई सदनमा व्यक्त गरेको धारणालाई बाहिर पनि निरन्तरता दिन आग्रह गर्दै अगाडि र पछाडि फरक–फरक कुरा नगर्न चेतावनी दिए।

“साथीभाइ माननीयज्यूहरू, जे अगाडि बोल्नुहुन्छ, पछाडि अर्कै बोल्नुहुन्छ। चित्त बुझ्दैन रहेछ। अगाडि जसरी बोल्नुभएको छ, त्यसरी नै पछाडि पनि बोल्नुपर्‍यो,” उनले भने।

उनका अनुसार सांसदहरू अगाडि आएर घुलमिलका साथ कुरा गर्ने तर पछि फरक ढंगले अभिव्यक्ति दिने गरेका छन्। “सदनमा जे बोल्नुहुन्छ, बाहिर पनि त्यसरी नै व्यवहार गरेर बोल्नुस्। अनि मात्रै वास्तविक धारणा थाहा हुन्छ,” उनले भने।

गृहमन्त्री गुरुङले अगाडि एउटा र पछाडि अर्को कुरा गर्ने शैली आफूहरूलाई स्वीकार्य नभएको स्पष्ट पारे।