दाङको देउखुरीस्थित राप्ती नदीमा डुबेर एक बालकको मृत्यु भएको छ। तुलसीपुर उपमहानगरपालिका–६ गोलौराका खडक सिंह डाँगीका ६ वर्षीय छोरा किशन डाँगीको नदीमा नुहाउने क्रममा डुबेर मृत्यु भएको हो।

जिल्ला प्रहरी कार्यालय दाङका अनुसार उनी राजपुर गाउँपालिका–७ हाटबासस्थित मामाको घरमा आएका बेला राप्ती नदीमा नुहाउन गएका थिए।

नदीमा डुबेर अचेत भएका किशनलाई तत्काल उद्धार गरी लमही अस्पताल पुर्‍याइएको थियो। तर, अस्पताल पुर्‍याएलगत्तै चिकित्सकले उनलाई मृत घोषणा गरेका थिए। मृतक बालकको शव हाल लमही अस्पतालमा राखिएको प्रहरीले जनाएको छ।