१४ माघ, काठमाडौं — खाद्य प्रविधि तथा गुण नियन्त्रण विभागले काठमाडौंको कागेश्वरी मनोहरा क्षेत्रमा सञ्चालित विभिन्न खानेपानी उद्योगमा आकस्मिक अनुगमन गर्दै कारबाही प्रक्रिया अघि बढाएको छ।

सोमबार मोबाइल खाद्य प्रयोगशाला भ्यानसहित खटिएको विभागको विशेष टोलीले खाद्य स्वच्छता तथा गुणस्तर ऐन, २०८१ बमोजिम उद्योगहरूको निरीक्षण गर्दा सरसफाइमा गम्भीर लापरबाही र न्यूनतम मापदण्डसमेत पालना नगरेको फेला पारेको हो।

अनुगमन क्रममा मनोहरा फुड एन्ड बेभरेज, ओसियन ड्रिंकिङ वाटर, सिद्धकाली आक्वा र भद्रकाली पानी उद्योगमा कैफियत भेटिएको विभागले जनाएको छ। विशेष गरी ओसियन र सिद्धकाली आक्वा उद्योगमा कामदारको व्यक्तिगत सरसफाइ सन्तोषजनक नरहेको, उत्पादन कक्षको भुइँमा पानी जमेको तथा लेउ लागेका र कुच्चिएका जारमा पानी भरेर बिक्रीका लागि राखिएको पाइएको थियो।

विभागको टोलीले ती उद्योगबाट प्रयोग गर्न नमिल्ने २२ थानभन्दा बढी जार तत्काल नष्ट गरिदिएको छ। साथै, केही उद्योगमा आफ्नै प्रयोगशाला नभएको र प्रशोधित पिउने पानी उत्पादनसम्बन्धी निर्देशिकाबमोजिम आवश्यक अभिलेखसमेत नराखिएको पाइएकाले सुधारका लागि कडा निर्देशन दिइएको छ।

विभागकी प्रवक्ता डा. बालकुमारी शर्माका अनुसार अनुगमन गरिएका सबै उद्योगबाट पानीका नमुना संकलन गरी थप परीक्षणका लागि प्रयोगशालामा पठाइएको छ।

उद्योग परिसर तथा उत्पादन कक्ष तत्काल मर्मत गरी दैनिक सरसफाइ गर्न निर्देशन दिँदै विभागले संकलित नमुनाको प्रयोगशाला प्रतिवेदनमा कैफियत देखिए खाद्य स्वच्छता तथा गुणस्तर ऐन बमोजिम थप कडा कानुनी कारबाही गरिने स्पष्ट पारेको छ।