रुकुम पश्चिम – चौरजहारी नगरपालिका–१, एयरपोर्ट नजिकै शुक्रबार साँझ शङ्कास्पद विस्फोटक पदार्थ फेला परेको छ।

स्थानीय धीरजबहादुर क्षेत्रीको घरको कम्पाउण्डमा पर्खाल लगाउन जग खन्ने क्रममा जमिनमुनि विस्फोटक पदार्थ जस्तो देखिने वस्तु भेटिएको हो। घटनाबारे स्थानीयले तत्काल सुरक्षा निकायलाई जानकारी गराए।

इलाका प्रहरी कार्यालय चौरजहारीबाट प्रहरी निरीक्षक अजय डाङ्गीको नेतृत्वमा टोली घटनास्थल पुगेको थियो। जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरिप्रसाद पुनका अनुसार फेला परेको वस्तु सकेट बम जस्तो देखिएको छ। पुनले भने, “स्थानीयको सूचना पाएलगत्तै टोलीले घटनास्थललाई सुरक्षित घेरामा राखेको छ।”

उक्त शङ्कास्पद बस्तुलाई निष्क्रिय पार्न नेपाली सेनासँग समन्वय भइरहेको छ। राति भइसकेकाले सुरक्षा व्यवस्था कडा पारिएको छ भने सम्भवतः आज बिहान सेनाको डिस्पोजल टोलीले बमलाई सुरक्षित व्यवस्थापन गर्ने तयारी गरेको प्रहरीले जनाएको छ।

विगतमा सशस्त्र द्वन्द्वको प्रभाव रहेको क्षेत्र भएकाले यो बम द्वन्द्वकालमै छुटेको हुनसक्ने अनुमान गरिएको छ। यद्यपि यसको आधिकारिक पुष्टि भने सेनाको प्राविधिक टोलीले जाँच गरेपछि मात्र हुनेछ।