काठमाडौं — बागमती प्रदेश सरकारले विपद्को पूर्वतयारी सुदृढ बनाउन नेपाली सेना, नेपाल प्रहरी र सशस्त्र प्रहरी बललाई रु दुई करोड ४७ लाख १२ हजार ३१० बराबरका उद्धार सामग्री तथा उपकरण हस्तान्तरण गरेको छ।

मुख्यमन्त्री तथा मन्त्रिपरिषद्को कार्यालयमा शनिबार आयोजित कार्यक्रममा मुख्यमन्त्री इन्द्रबहादुर बानियाँले नेपाली सेनालाई रु ७५ लाख ६२ हजार ३००, नेपाल प्रहरीलाई रु ५४ लाख ६६ हजार ४८८ र सशस्त्र प्रहरी बललाई रु एक करोड १६ लाख ८३ हजार ५२२ बराबरका सामग्री उपलब्ध गराए। हस्तान्तरण गरिएका सामग्रीमा अत्याधुनिक ड्रोन तथा बाढी उद्धारका लागि आवश्यक उपकरणसमेत समावेश छन्।

यसअघि मुख्यमन्त्री बानियाँले वर्षाजन्य तथा अन्य विपद्को पूर्वतयारी, राहत सामग्री व्यवस्थापन र सुरक्षा संयन्त्रको उच्च सतर्कताबारे तीनै सुरक्षा निकायका अधिकारीहरूसँग छलफल गरेका थिए।

मुख्यमन्त्री बानियाँले वर्षायामसँगै बाढी, पहिरो, डुबान र सडक अवरोधको जोखिम बढ्ने भएकाले प्रदेश सरकारले विपद् पूर्वतयारीलाई उच्च प्राथमिकतामा राखेको बताए। उनले विगतका अनुभवका आधारमा जोखिमको पूर्वानुमान, राहत सामग्री व्यवस्थापन, सूचना प्रणालीको सुदृढीकरण तथा उद्धार संयन्त्रलाई अझ प्रभावकारी बनाइने उल्लेख गरे।

उनका अनुसार प्रदेशभरका सम्भावित बाढी, पहिरो तथा डुबान प्रभावित क्षेत्रको अध्ययन भइरहेको छ। विपद् व्यवस्थापनमा सङ्घ, प्रदेश र स्थानीय तहबीच प्रभावकारी समन्वय आवश्यक रहेको बताउँदै उनले स्थानीय तहहरूबीच सूचना आदानप्रदान प्रणालीलाई पनि व्यवस्थित बनाइने जानकारी दिए।

प्रदेश सरकारले नुवाकोट र हेटौँडा उपमहानगरपालिकाको थानाभर्‍याङमा विपद् व्यवस्थापनका लागि आवश्यक राहत सामग्री तथा उपकरण भण्डारण गरिसकेको जनाएको छ।