१३ पुस, काठमाडौं। उज्यालो नेपाल पार्टीले रास्वपा सभापति रवि लामिछाने र काठमाडौं महानगरका मेयर बालेन्द्र शाहबीच भएको सातबुँदे सम्झौताले जेनजी आन्दोलनको भावनालाई पूर्ण रूपमा समेट्न नसकेको बताएका छन्।

शनिबारको केन्द्रीय समितिको बैठकमा पार्टीले रास्वपाबाट आएको एकता प्रस्ताव अस्वीकार गर्ने निर्णय गरेको थियो। तर १२ घण्टा नबित्दै रवि–बालेनबीच सोही प्रस्तावमा आधारित सातबुँदे सहमति भएको थियो।

उज्यालो नेपाल पार्टीका केन्द्रीय सदस्य जितराम लामाले सम्झौतामा नीतिगत र वैचारिक अस्पष्टता रहेको र केवल पदको भागवण्डा भएको बताए। उनले भने, “हामी हाम्रै हिसाबले संगठन विस्तार गर्दै अघि बढ्छौं। कुलमान घिसिङलाई भावी प्रधानमन्त्रीको रूपमा अघि सारेर जनतामा जानेछौं।”

लामाले सम्झौताले जेनजी आन्दोलनको मूल भावनालाई समेट्न नसकेको र देशका समस्याको समाधानका विषयमा स्पष्टता नभएको पनि बताएका छन्।