काठमाडौँ– थाइल्यान्ड र क्याम्बोडियाले शनिबार तत्काल युद्धविराम लागू गर्ने सहमति जनाएका छन्। दुवै देशले पछिल्ला केही हप्तादेखि जारी सीमा संघर्ष रोक्दै शान्ति स्थापना गर्ने प्रतिबद्धता व्यक्त गरेका छन्।

तीन हप्तादेखि जारी द्वन्द्वका क्रममा कम्तीमा ४७ जनाको मृत्यु भएको र एक लाखभन्दा बढी मानिस विस्थापित भएको बताइएको छ। युद्धविराम सम्झौताअनुसार दुवै पक्षले सबै प्रकारका हतियार प्रयोग तत्काल रोक्ने, नागरिक र संरचनामाथि कुनै पनि आक्रमण नगर्ने तथा सीमा क्षेत्रमा बसोबास गर्ने विस्थापित नागरिकलाई छिट्टै घर फर्कन अनुमति दिने व्यवस्था लागू गरिनेछ।

साथै, दुवै देशले साइबर अपराध नियन्त्रणमा आपसी सहकार्य गर्ने प्रतिबद्धता पनि जनाएका छन्।

यो युद्धविराम तीन दिने सीमा वार्तापछि भएको हो, जसमा आसियान, संयुक्त राज्य अमेरिका, चीन र मलेसियाले मध्यस्थताको भूमिका निर्वाह गरेका थिए। सीमा विवाद उपनिवेशकालीन सिमाङ्कनसँग सम्बन्धित रहेको बताइएको छ, जहाँ रहेको एक प्राचीन मन्दिरमाथि दुवै देशले दाबी गर्दै आएका छन्।

थाइल्यान्डका प्रधानमन्त्रीले यो सहमतालाई दीर्घकालीन शान्तिको आधार बनाउने आग्रह गर्दै सीमा क्षेत्रमा शान्ति कायम गर्ने र विस्थापित नागरिकलाई सुरक्षित रूपमा घर फर्काउन सहयोग गर्ने बताएका छन्। यसैबीच, थाइल्यान्डमा आगामी फेब्रुअरी ८ मा आम निर्वाचन हुने तय भएको छ।