काठमाडौं— पेट्रोल छर्केर आगो लगाई बुहारीको हत्या गरेको अभियोगमा सासु र नन्द पक्राउ परेका छन्।

जिल्ला प्रहरी कार्यालयले आज जारी गरेको विज्ञप्तिअनुसार कमलामाई नगरपालिका–४ धुराफाँटकी ३२ वर्षीया सुशीला बम्जनको हत्या गरेको आरोपमा उनकी सासु ५९ वर्षीया मायारानी बम्जन र नन्द ३५ वर्षीया मीना लामा पक्राउ परेका हुन्।

प्रहरीका अनुसार अभियुक्तद्वयले गत आइतबार सुशीलामाथि पेट्रोल छर्केर आगो लगाएका थिए। घटनास्थलबाट जलेको शव बरामद गरिएको छ। मृतकका श्रीमान् विगत दुई वर्षदेखि वैदेशिक रोजगारीमा रहेका छन्।

घटनामा मृतकका ससुरा दुर्गामान बम्जन घाइते भएका छन्। उनको उपचारका लागि काठमाडौँ पठाइएको प्रहरीले जनाएको छ।

अभियुक्तलाई जिल्ला अदालतबाट म्याद थप गरी थुनामा राखिएको छ। घटनाको निष्पक्ष छानबिन तथा दोषीमाथि कडा कारबाहीको माग गर्दै स्थानीयवासीले जिल्ला प्रहरी कार्यालय घेराउ गरेका छन्।