काठमाडौँ — जेन–जी आन्दोलनका अगुवा मिराज ढुंगाना समूहले आज पनि काठमाडौँमा प्रदर्शन जारी राखेका छन्। भदौ २३ र २४ गतेको विद्रोहपछि गठन भएको सुशीला कार्की नेतृत्वको अन्तरिम सरकार पूर्णरूपमा असफल भइसकेको आरोप लगाउँदै आन्दोलनकारीहरूले हिजोदेखि निरन्तर प्रदर्शन गरिरहेका हुन्।

आज माइतीघर मण्डलामा प्रहरीले घेरा हालेको अवस्थामा निकोलस भुसाललगायतका आन्दोलनकारीहरूले प्रदर्शन गरेका छन्। उनीहरूले अन्तरिम सरकारले जनअपेक्षा अनुसार काम गर्न नसकेको, शासन र व्यवस्थापन कमजोर भएको तथा जनताको आवाज बेवास्ता गरिएको दाबी गरेका छन्।

आन्दोलनकारीहरूले राजनीतिक स्थायित्व, पारदर्शिता र जवाफदेहिताको माग गर्दै दबाबमूलक कार्यक्रमलाई निरन्तरता दिने बताएका छन्। प्रदर्शनका क्रममा कुनै अप्रिय घटना भने नभएको प्रहरीले जनाएको छ।

सरकारतर्फबाट यसबारे औपचारिक प्रतिक्रिया भने आइसकेको छैन।