काठमाडौं — सरकारले माघको अन्तिम सातादेखि देशभर पाठेघर क्यान्सर रोकथामका लागि ‘ह्युमन प्यापिलोमा भाइरस’ (एचपिभी) खोप कार्यक्रम सञ्चालन गर्ने भएको छ। यो कार्यक्रम नियमित राष्ट्रिय खोप तालिकाअनुसार सञ्चालन हुने स्वास्थ्य तथा जनसङ्ख्या मन्त्रालयले सोमबार जानकारी दिएको छ।

कार्यक्रम स्वास्थ्य मन्त्रालयको परिवार कल्याण महाशाखा र युनिसेफ नेपालको प्राविधिक सहयोगमा सञ्चालित हुनेछ। बाल स्वास्थ्य तथा खोप शाखा प्रमुख डा. अभियान गौतमका अनुसार करिब साढे तीन लाख किशोरीलाई लक्षित गरेर खोप दिइनेछ, जो कक्षा ६ मा अध्ययनरत १० वर्ष पूरा गरेका छन्।

डा. गौतमले भने, “खोप दिने समयमा निर्वाचन तथा चाडपर्वले केही प्रभावित पार्न सक्छ, तथापि माघको अन्तिमबाट सुरु गरी फागुनको पहिलो साता अभियान सम्पन्न गर्ने तयारी भइरहेको छ। यसबारे थप जानकारी र मिति छिट्टै सार्वजनिक गरिनेछ।”

गत वर्ष सरकारले कक्षा ६ देखि १० सम्म अध्ययनरत करिब १७ लाख किशोरीलाई दुई मात्राको खोप दिएको थियो। यस वर्ष वैज्ञानिक सिफारिस अनुसार एक मात्राको खोप दिइनेछ। डा. गौतमले खोपको प्रभावकारिता एक मात्रामा पनि हुने भएकाले लक्षित समूहलाई ढुक्क भएर खोप लगाउन आग्रह गरेका छन्।

स्वास्थ्य मन्त्रालयको तथ्याङ्कअनुसार नेपालमा प्रत्येक दिन औसत चार महिलाको पाठेघर क्यान्सरबाट मृत्यु हुन्छ। महिलामा हुने क्यान्सरमध्ये पाठेघर क्यान्सर दोस्रो मुख्य कारण हो र मृत्युको मुख्य कारण पनि यही क्यान्सर रहेको छ। यसको प्रमुख कारण ह्युमन प्यापिलोमा भाइरसको सङ्क्रमण हो।

सरकार हाल १४ वटा रोग विरुद्ध ११ प्रकारका खोप उपलब्ध गराइरहेको छ। डा. गौतमका अनुसार नेपालले खोप कभरेजमा विकसित मुलुकको तुलनामा पनि उल्लेखनीय प्रगति गरेको छ र खोप प्रति मानिसको सकारात्मक धारणा कायम राख्दा यस कार्यक्रम अझ प्रभावकारी बन्ने अपेक्षा गरिएको छ।