काठमाडौँ — कोशी प्रदेश सरकारले खानेपानी, सिँचाइ तथा ऊर्जा मन्त्रालय अन्तर्गतका प्राविधिक कर्मचारीलाई लक्षित गरी सञ्चालन गरेको तीनदिने सौर्य लिफ्टिङ प्रणाली तथा लघु जलविद्युत् आयोजना तालिम सम्पन्न भएको छ।

तालिममा प्रदेशभरका विभिन्न डिभिजन कार्यालयका २४ जना प्राविधिक सहभागी थिए। तालिमका सहभागीहरूले बताएअनुसार, प्राविधिक क्षमता अभावका कारण धेरै आयोजना नियमित सञ्चालनमा नआएको अवस्थामा यस्ता तालिमले व्यावहारिक सीप अभिवृद्धि गर्न सहयोग पुग्नेछ।

उद्घाटन कार्यक्रममा मन्त्री एकराज कार्कीले तालिममार्फत कर्मचारीको डिजाइन, सञ्चालन र मर्मतसम्भार क्षमता वृद्धि हुने बताए। तालिम समापनमा सचिव पुष्करप्रसाद पोखरेलले चालु र आगामी वर्षमा कार्यान्वयन हुने पम्पिङ योजना तथा लघु जलविद्युत् परियोजनाको प्रभावकारी कार्यान्वयनमा सहयोग पुग्ने अपेक्षा व्यक्त गरे।

यस तालिमलाई जिआइजेड नेपालअन्तर्गतको रिप–ग्रीन कार्यक्रमले सहयोग गरेको थियो, जसले नवीकरणीय ऊर्जा प्रवर्द्धन, योजना निर्माण र प्राविधिक परामर्शमा निरन्तर समर्थन प्रदान गर्दै आएको छ। सहभागी प्राविधिकहरूले तालिमले ग्रामीण क्षेत्रमा दिगो ऊर्जा पहुँच विस्तारमा टेवा पुग्ने विश्वास व्यक्त गरेका छन्।