भैरहवा, १६ पुस– लुम्बिनी प्रदेशका मुख्यमन्त्री चेतनारायण आचार्यले गौतमबुद्ध अन्तर्राष्ट्रिय विमानस्थललाई नियमित रूपमा सञ्चालन गर्न विदेशी राष्ट्रहरूसँग कूटनीतिक सम्बन्धका आधारमा वातावरण निर्माण गर्न आवश्यक भएको बताएका छन्।

नेपाल नागरिक उड्डयन प्राधिकरणको २७औँ वार्षिकोत्सव समारोहमा बोल्दै मुख्यमन्त्री आचार्यले अन्तर्राष्ट्रिय हवाई उडान नियमित सञ्चालनका लागि विश्व समुदायको विश्वास आर्जन गर्न कूटनीतिक पहल अपरिहार्य रहेको बताए। उनले भने, “लुम्बिनी प्रदेशमा जुन उद्देश्य राखेर अन्तर्राष्ट्रिय विमानस्थल निर्माण गरिएको हो, यसलाई नियमित सञ्चालन गर्न प्रदेश सरकार सङ्घीय सरकारसँग माग गर्दछ। विमानस्थल सञ्चालन नभएको कारण व्यवसायीहरू धराशायी हुनु हुँदैन।”

मुख्यमन्त्री आचार्यले प्रदेश सरकारले आवश्यक साझेदारी र समन्वय गर्न पूर्ण रूपमा तयार रहेको स्पष्ट पारे। उनले सङ्घीय सरकारले अहिलेसम्म विमानस्थल सञ्चालन सम्बन्धी प्रस्तावमा कुनै निर्णय नगरेकोप्रति असन्तुष्टि व्यक्त गरे।

उनले अन्तर्राष्ट्रिय कूटनीतिक सम्बन्ध विस्तार गरी विश्वास निर्माण गर्नुपर्नेमा जोड दिँदै, प्रदेश सरकारले आवश्यक परे जिम्मेवारी लिन तयार रहेको बताए। मुख्यमन्त्री आचार्यले ट्राभल एजेन्सीहरूलाई भैरहवा ल्याएर प्रभावकारी प्रचारप्रसार गर्न, यात्रुहरूको भरपर्दो उडान सुनिश्चित गर्न र गौतमबुद्धको जन्मस्थल लुम्बिनीसँग विमानस्थललाई जोडेर विश्वभर सन्देश पुर्‍याउनुपर्ने आवश्यकता औँल्याए।